Lojrat Dimërore dhe sulmet terroriste në ish Stalingrad. A është e sigurtë Rusia?

Lirimi i kundërshtarëve politikë si ish miliarderi Khodorkovski apo këngëtaret e grupit Pussy  Riot, edhe pse i pamendueshëm deri pak muaj më parë, u komentua si lëvizje e qartë e presidentit rus Vladimir Putin për përmirësimin e imazhit në prag të Lojrave Olimpike Dimërore të Soçit. Por për trazimin e rendit publik dhe sigurisë në Rusi po mendon një faktor tjetër, që autoritetet ruse me gjasë e kanë nenvlerësuar: Sulmet vetëvrasëse terroriste nga elementët radikalë të republikave të Kaukazit. Të paktën 16 të vdekur dhe 34 të plagosur gjatë një shpërthimi në një stacion hekurudhor në qytetin e Volgogradit (ish Stalingradi), në afërsi të rajonit të paqëndrueshëm të Kaukazit, u pasuan nga një tjetër sulm i ngjashëm ndaj një autobuzi, duke marrë dhjetë jetë njerëzish. Dyshohet se kamikaze janë “vejushat e zeza”, bashkëshortet apo të afërmet e rebelëve muslimanë të vrarë nga forcat ruse të sigurisë gjatë luftrave në Çeçeni e gjetiu. Presidenti Putin urdhëroi sot përforcimin ekstrem të masave të sigurisë në të gjithë vendin, njoftoi Komiteti Antiterrorist Rus. Megjithatë, pyetja ende mbetet: A janë Lojrat të sigurta?

a.k