Portali ‘e-zani.com’ distancohet nga imamët e arrestuar; por edhe nga media e sistemi gjyqësor

Gazetat e televizionet kanë raportuar zellshëm mbi arrestimin e imamëve e besimtarëve që janë përfshirë –kjo është akuza që u bëhet – në rekrutimet e njerëzve për në Siri, por nuk është nënvizuar fakti se ka dhe segmente të rëndësishme brenda komunitetit mysliman që nuk u kanë dalë në mbrojtje të arrestuarëve. Madje, këto segmente (që janë segmente përfaqësuese të këtij komuniteti) kanë pretendimin se e kanë kritikuar sjelljen e dy imamëve të arrestuar përara se ata të arrestoheshin. Portali e-zani.com që është një nga zërat e moderuar mediatikë të myslimanëve shqiptarë ka publikuar një editorial, ku thuhet se “kanë qenë udhëheqës fetarë të xhamive të vendit ata që u kanë tërhequr vëmendjen dhe u kanë kërkuar që të ndërhyjnë që imami Genc Balla të ndalte retorikën inflamatore në lidhje me luftën në Siri”. Në këtë editorial qortohet vrulli mediatik që prodhon, edhe pa e synuar, “reagime negative ndaj gjithë bashkësisë së muslimanëve shqiptarë”; qortohet gjithashtu fakti që Ministria e Rendit nuk ka qenë transparente e nuk ka bashkëpunuar me institucionet e bashkësisë së besimtarëve, por në të njëjtën kohë bëhet distancimi nga sjellja e imamëve para e pas arrestit.

Në shkrimin në fjalë (mund ta ndiqni të plotë në linkun http://www.e-zani.com/2014/03/14/fajesia-e-parakohshme-e-muslimaneve-te-arrestuar/) hidhen dyshime, megjithatë, mbi ligjshmërinë e arrestimeve që janë bërë.

Re.Pu.