Berisha & Topalli kërkojnë opozitë radikale

Ish-kryeministri Sali Berisha dhe ish-kryetarja e Kuvendit, Jozefina Topalli janë për një linjë të ashpër opozitare. Berisha, gjithashtu i lodhur nga angazhimi i tepërt në sallën e Kuvendit, u ka kërkuar deputetëve të opozitës që të jenë më aktivë.Gjatë seancës së djeshme që zgjati mbi 10 orë, PD kërkoi pushim për të mbledhur grupin parlamentar. Berisha me sa duket ishte lodhur. Por më shumë se kaq, ai po shkonte në mbledhjen e grupit demokrat me një pakënaqësi të shpërmatur. I pezmatuar me “të tijtë” për mungesën e reagimit dhe qëndrimin thuajse pasiv më së shumti nga ish-ministrat e tij për ato çfarë thuheshin në Kuvend, Berisha u ka kërkuar deputetëve të jenë më agresivë. “…Duhet të flisni edhe ju! Kur ata ju shajnë, duhet të reagoni edhe ju”, – mësohet t’u ketë thënë Berisha deputetëve demokratë sipas gazetës “Mapo”.Në thirrje për një opozitë më të ashpër është bashkuar edhe ish-kryetarja e Kuvendit, Jozefina Topalli, e cila gjatë seancës së djeshme ishte e pakënaqur ndaj Metës për minutazhin e pamjaftueshëm që i lihej Berishës gjatë replikave. “Opozita është shpirt… është zemër…Ish-ministrat duhet të flasin dhe të mbrojnë punën e tyre”, – mësohet të jetë shprehur ajo. S.S