Detyrimet e prapambetura të "Berishës": 750 apo 350 milion dollarë?

Duke folur sot në Kuvend rreth detyrimeve të prapambetura të qeverisë së mëparshme, Kryeministri Rama tha: “Ja besuam FMN-së skanimin e borxhit, skanimi i borxhit nuk ka mbaruar dhe nga skanimi doli një shifër shumë më e lartë nga ajo që ne kishim paraparë. Ne nuk kemi rritur borxhin, por legalizuam atë borxh që qeveria paraardhëse e mori për kumarin elektoral. Patjetër që do të matemi me fjalët tona, kemi katër vjet për ta bërë këtë, por pasojat keqqeverisjes suaj i kemi përpara në formën e një shkëmbi borxhesh të prapambetura që na ka zënë rrugën dhe duhet ta asgjësojmë, dhe do ta asgjësojmë me këtë buxhet”.

Më tej ai vijoi me këtë listë detyrimesh të prapambetura:

“270 milionë dollarë kontrata të lidhura e të papaguara nga ju.

160 milionë dollarë për rimbursimin e TVSH, i keni lënë aty.

50 milionë për ujin dhe dritat i keni lënë pas.

40 milionë dollarë për financimin e qeverisjes vendore nga ekzekutivi i keni lënë pa financuar.

60 milionë dollarë që duhet të ishin shpenzuar për ndihmëm ekonomik, i shpenzuar për kumarin elektoral.

E me rradhë të tjerat në shumën e 750 milionë dollarëve.”

Por në buxhetin e qeverisë për vitin 2014 parashikohen vetëm 350 milionë dollarë për shlyerjen e detyrimeve të papaguara të qeverisë së mëparshme.

Pra, i bie që, ose një pjesë 400 milion dollarëshe e “shkëmbit të borxheve të prapambetura” nuk do të “asgjësohet me këtë buxhet”, ose që Kryeministri të mos i ketë bërë mirë llogaritë në fjalimin e tij të sotëm në Kuvend...

E.Zaloshnja