Shënim: Strategjia e Berishës në penën e Artan Hoxhës

Me një not stil bretkose, Artan Hoxha (jo gazetari që dokumentoi sesi u vra Ziver Veizi në 21 janar 2011, tek po bënte sehir me duar në xhepa në bulevard) noton sot në një opinion të botuar te Panorama, në mënyrë sarkastike, në ujrat e turbulluara të politikës shqiptare të ditëve të fundit. Meqënëse artikujt e Hoxhës (Artan) kanë shërbyer si parathënie e lëvizjeve politike që ka bërë Berisha, vlen të citohen disa pasazhe nga shkrimi i tij i sotëm.

Shkruan Artani: “Saliu i la gojëhapur. Magjistar. Kur thuajse besuan se po i binte murit me kokë, ai kapërceu me shkopin magjik matanë. Argument ligjor, i kërkuan ndërkombëtarët. Jo ribalancim. Saliu e gjeti zgjidhjen. Cenin në karrierë të ish-LSI-stit… Kot s’thonë se fati ndihmon fitimtarët. Pra Saliun” “

[Edi&Ilir, keni] dyshime ligjore për ribalancimin [e KQZ-së]? Gjykatën [të Sashenkës] aty e keni. [Përndryshe], plotësoni vendet bosh në KQZ. Tek e fundit, ajo edhe me 5 veta funksionon… Sa për KQZ-në, rroftë greku se me vetëngrirjen e tij, në KQZ janë më shumë se 4, por më pak se 5, ndaj kësmet deri më 23 prill.”

Në vitin 1996, Artani notoi kundër rrymës së Berishës dhe, si rrjedhojë, përfundoi këshilltar i Nanos, kur ky i fundit erdhi në pushtet. Tani, Artani po noton me rrymën e Berishës - por, a do të përfundojë ai këshilltar i Edi Ramës, në qoftë se ky i fundit vjen në pushtet…?
a.k.