Ilir Meta i ka vënë kapak së shkuarës. “Më intereson e ardhshmja”, thotë ai

Ilir Metës nuk ia ka qejfi të ndalet në të shkuarën e marrëdhënieve me PD-në e me PS-në. Në një intervistë dhënë Anila Bashës të së përditshmes shqiptarja.com, ai “i bën dredha” këmbënguljes së kryeredaktores së gazetës së Bolinos. “Me të kaluarën le të merren historianët”, thotë Meta. “Nuk kam ndërmend të harxhoj asnjë sekondë të kohës sime për gjëra që s’kanë të bëjnë me të ardhshmen”.

Po kështu, i bën bisht dhe kërkesës për të hedhur pak dritë mbi paktin e sapolidhur mes tij e Ramës. “Cili është kumbari?”, pyet Basha. “Pakti është produkt i kohës, është rrjedhim logjik dhe objektiv i zhvillimeve të kaluara”, është përgjigja. “Po kush e bëri telefonatën e parë, ju apo Rama?”, insiston gazetarja. “Nuk ka rëndësi se kush e bëri telefonatën e parë; kjo është një alternativë e re, dhe është një domosdoshmëri e kohës”, ia kthen lideri i LSI-së, që në fund shprehet i sigurtë se “maxhoranca e re e pas 23 qershorit do të jetë shumë më solide se sa kjo e katër viteve të shkuara”.

Re.Pu.