Pse duhet votuar një parti e vogël nëse dhe vetë kryetari kandidon si i PS?

Panorama dje publikonte lajmin se partitë aleate të koalicionit opozitar i kanë kërkuar Edi Ramës që të përfshijë krerët e tyre në listat e PS-së për deputetë. Ky lajm, sanksionon dhe de jure  inekzistencën e partive të vogla, që në të vërtetë reduktohen në emra individësh dhe jo në parti që përfaqësojnë grupe të vogla interesash.

Kreu i PDS-së, Paskal Milo, kreu socialdemokrat Skënder Gjinushi, kryetari i Ligj dhe Drejtësi, Spartak Ngjela, kreu i PSV91 Petro Koçi, sekretari i Parë i Partisë së Punës së Reformuar, Marko Dajti, por dhe kreu i Partisë Socialiste të Moderuar, Gjergj Koja, i kanë kërkuar Ramës që ata të jenë pjesë e listës së PS-së në qarqe të ndryshme.

Sipas medias, kërkesat e tyre janë depozituar ditë më parë në selinë e PS,  ndërsa presin një takim me liderin Rama, i cili nga ana e vet duket se po pret se ç’do të ndodhë me ‘polin e tretë’, AK FRD dhe LSI .

k.c.