Palantir humb gjyqin me revistën investigative zvicerane “Republik”

Palantir ka humbur gjyqin me një revistë zvicerane, të cilës i ka kërkuar të publikojë përgjigjet e saj që lidhen me artikuj ku flitet me detaje për refuzimin e shërbimeve të saj nga ana e qeverisë në Bernë.

Gjykata Tregtare e Zyrihut hodhi poshtë 22 nga 23 kërkesat për kundërdeklaratë të paraqitura nga kompania amerikane e analizës së të dhënave dhe dega e saj zvicerane, duke gjetur se vetëm një pasazh i vetëm në një artikull justifikonte një përgjigje të publikuar nga kompania e themeluar nga Peter Thiel.

Mosmarrëveshja rrjedh nga dy artikuj të Republik që raportuan se si agjencitë qeveritare kishin refuzuar të miratonin softuerin e kompanisë dhe ngritën shqetësime në lidhje me çështje që lidhen me sovranitetin e të dhënave dhe pajtueshmërinë ligjore.

Artikujt janë publikuar në dhjetor dhe bazohen kryesisht në kërkesat për lirinë e informacionit. Ato raportojnë mbi përpjekjet shumëvjeçare të Palantir për të siguruar biznes me autoritetet federale zvicerane.

Padia ka pasur një "efekt Streisand", duke tërhequr vëmendje më të gjerë ndaj raportimit të Republik dhe dokumenteve të qeverisë zvicerane që detajojnë shqetësime të përsëritura zyrtare në lidhje me miratimin e teknologjisë së Palantir.

Kompania ka tërhequr vëmendje edhe përtej Zvicrës sepse qeveri të tjera europiane kanë ngritur  shqetësimet në lidhje me mbështetjen te ofruesit e teknologjisë amerikane për funksione të ndjeshme shtetërore.

Palantir, softueri i të cilit përdoret gjerësisht nga agjencitë e mbrojtjes dhe inteligjencës amerikane, po has vështirësi në Europë, kur qeveritë po i rivlerësojnë varësinë e tyre nga kompanitë amerikane të teknologjisë.

Kjo ka sjellë tkurrjen e rritjes së Palantir në biznesin e saj ndërkombëtar. Në Mbretërinë e Bashkuar, marrëveshja e saj prej 330 milionë stërlinash me Shërbimin Shëndetësor Kombëtar i është nënshtruar një rivlerësimi të konsiderueshëm, ndërsa kryebashkiaku i Londrës, Sadiq Khan, vuri veton ndaj një kontrate prej 50 milionë stërlinash me Policinë Metropolitane të qytetit.