Karaxhiç

Radovan Karaxhiç, lideri i dikurshëm politik i serbëve të Bosnjes, dënuar aktualisht nga Gjykata e Hagës, ka deklaruar në një intervistë për gazetën “Vecernje Novosti”, se ai kishte patur një marrëveshje sekrete me diplomatin amerikan Richard Holbrook. Sipas tij, Holbrook kishte kërkuar firmosjen e Marrëveshjes së Dejtonit, tërheqjen e Karaxhiç nga politika dhe në këtë kuadër atë do ta linin të lirë.

Radovan Karaxhiç ka apeluar dënimin me 40 vite burg për genocid, duke e quajtur gjyqin ndaj tij politik. Karaxhiç ka renditur 50 arsye për të cilat thotë se është dënuar politikisht sepse mbrojti popullin serb të Bosnjës.
Në 24 Mars të këtij viti, Gjykata e Hagës e shpalli fajtor ish-liderin e serbëve të Bosnjës për masakrimin e 8 mijë burrave dhe djemve myslimanë në Srerbrenicë në vitin 1995. Sipas avokatit të tij, Peter Robinson, procesi ndaj Karaxhiç nuk ishte i drejtë, pasi gjykatësit që e gjykuan nuk dinin asgjë për zonën, kulturën dhe gjuhën e serbëve të Bosnjës.