FDA autorizon trajtimin me antitrupa kundër COVID-19

Administrata e Barnave dhe Ushqimit në SHBA ka miratuar një trajtim parandalues me antitrupa për individë që janë vulnerabël ndaj Covid-19. Kjo kategori qytetarësh përfshin ata që janë mëtë rrezikuar nga virusi, për shkak të sistemit imunitar të dëmtuar.

Sipas NBC, nga ky vendim preken 3% e amerikanëve, mes të cilëve pacientë me sëmundje autoimune, pacientë me HIV, pacientë me kancer dhe individë që i janë nënshtruar transplantit të organeve, të cilët mund të jenë ende të prekshëm nga Covid edhe pasi të jenë vaksinuar me të dyja dozat.

Kjo është hera e parë që një trajtim i injektueshëm antitrupash miratohet për përdorim si parandalim i Covid pasi dikush është ekspozuar ndaj virusit.

REGEN-COV do të mbrojë nga infeksioni, por FDA thekson se ai nuk duhet parë si zëvendësues i vaksinës.

Një studim i kohëve të fundit zbuloi se shumë njerëz me kancer, transplant organesh dhe sëmundje autoimune nuk prodhojnë antitrupa koronavirusi pasi vaksinohen.

Trajtimet me antitrupa monoklonalë mund të ndihmojnë në parandalimin e sëmundjeve të rënda, shtrimin në spital dhe vdekjen. Por përdorimi i barnave ka mbetur i kufizuar sepse ato zakonisht duhet të administrohen përmes një infuzioni IV dhe duhet të jepen brenda 10 ditëve pas fillimit të simptomave të Covid.

Autorizimi i FDA-së i hap rrugën përdorimit si injeksion të këtij kokteji antitrupash. Doza e parë duhet të jepet jo më vonë se 96 orë pas ekspozimit.