bota

Amerika nuk do të mbështesë më fushatën ushtarake të Arabisë Saudite në Jemen. Presidenti Joe Biden kërkoi të enjten që lufta më shumë se gjashtëvjeçare, e parë gjerësisht si një konflikt ndërmjet ndërmjet Arabisë Saudite dhe Iranit, të marrë fund. Timothy Lenderking, diplomat veteran, është emëruar në postin e të dërguarit special të SHBA për Jemenin në përpjekje për të rritur kapacitetet diplomatike dhe "për t'i dhënë fund luftës në Jemen, një luftë e cila ka krijuar katastrofë humanitare dhe strategjike".

Danimarka bëhet vendi i parë që vë në jetë planin për një pasaportë digjitale të vaksinimit. Brenda shkurtit, danezët mund të kontrollojnë statusin e tyre online dhe të printojnë certifikatat e vaksinimit.

Ministri danez i Financave, Morten Bodskov, tha se pasaporta digjiitale e vaksinës është një mënyrë përmes të cilës mund të rimëkëmbet ekonomia.

Kufizimet që vendosën pjesa më e madhe e vendeve të botës vitin e kaluar reduktoi fluturimet në mënyrë drastike. Shoqata Ndërkombëtare e Transportit Ajror (IATA) thotë se përgjatë 2020, trafiku i pasagjerëve ra me dy të tretat. "Viti 2020 solli një sfidë të paparë për industrinë e linjave ajrore për shkak të kufijve të mbyllur dhe kontrolleve të rrepta të udhëtimit - të gjitha efektet e pandemisë", tha IATA.

"Në vitin 2020 në tërësi, trafiku i pasagjerëve ra me 66 për qind - deri tani rënia më e madhe në historinë e aviacionit."

Dritë në fund të tunelit për krizën politike të radhës në Itali. Mario Draghi, ish-shefi i Bankës Qendrore Evropiane, shihet si çelësi i zgjidhjes së krizës. Draghi takohet sot me presidentin Sergio Mattarella, i cili e ka bërë të qartë domosdoshmërinë për një qeveri jo-politike që do të udhëheqë Italinë gjatë pandemisë së koronavirusit. Palët erdhën në këtë konkluzion pasi përpjekjet për të mbajtur gjallë koalicionin qeverisës të udhëhequr nga kryeministri Giuseppe Conte dështuan përfundimisht.

Në një studim të botuar në “Lancet”, shkencëtarët konfirmuan të martën se vaksina ruse, Sputnik V, është efektive në 91.6% të rasteve. Kësaj i shtohet edhe afati i imunizimit që jep ajo, që sipas kreut të laboratorit ku u zhvillua, shkon të paktën deri 2 vjet.

Jack Ma nuk është më në listën e të preferuarve të qeverisë kineze. Themeluesi i "Grupit Alibaba" nuk figuronte në listën e sipërmarrësve kinezë të botuar nga media shtetërore, Shanghai Securities News.

Është 635 milionë vjet e vjetër dhe i ngjan një kërpudhe. Fosili më i vjetër i një organizmi tokësor i përket kohës para shfaqjes së dinosaurve. Një studim i publikuar në revistën “Nature Communications” reflekton punën e bërë nga studiuesit e American Tech College of Science, e koordinuar nga Shuhai Xiao, së bashku me Akademinë Kineze të Shkencave, Universitetin Guizhou të Kinës dhe Universitetin Amerikan të Cincinnati-t.

Në Mianmar, ushtria ka marrë kontrollin e vendit me anë të një grushti shteti. Me anë të një suklmi të befasishëm mëngjesin e së hënës, ushtria vuri nën kontroll institucionet dhe shpalli gjendjen e jashtëzakonshme, pas arrestimit të Aung San Suu Kyi dhe udhëheqësve të tjerë të lartë të qeverisë.

Ndarjet që ka shkaktuar vaksina dhe pamundësitë e disa vendeve për ta siguruar po krijojnë terren për manovra të reja.

Kompanitë më të mëdha në Dubai janë mbledhur në një aleancë që synon të shpërndajë 2 miliardë doza vaksinash Covid-19 nëpër botë brenda këtij viti.

India po tregon se mund të arrihet imuniteti i tufës kundër CoVid-19, edhe para se të shkohet te vaksinimi masiv. Javët e fundit, numri i të infektuarve dhe të vdekurve në vend ka rënë, në disa qytete të mëdha, por edhe në fshatra të caktuara. Në Indi kulmi maksimal i infeksionit u arrit më 16 shtator, me 97 895 raste në 24 orë; dje (30 janar 2021), rastet e reja ishin 10 974 me 86 vdekje, në vendin me popullsi 1 miliard e 340 milionë banorë.