PS më mirë në aleancë me LSI se FRD? Po, sipas Ngjelës.

Në një intervistë për News24, Spartak Ngjela ka folur për aleatët e mundshëm të opozitës. Ngjela është ndalur sidomos në 2 pika, aleanca me FRD dhe LSI. Me sa duket edhe Ngjela e sheh shpëtimin e rrëzimit të Berishës, ndaj të cilit është investuar fort prej disa vitesh, tek bashkëpunimi me LSI. Ai madje i bën thirrje LSI të rrëzojë qeverinë:“Meta nuk ka rrugë tjetër, e vetmja rrugë të rrëzojë këtë qeveri. Jo për kapriço, por këtë domosdoshmëri e solli historia. Kjo për shkak të krizës së rëndë që ka përfshirë vendin, përballë humbjes së integrimit për faj të Berishës. Pra duhet të vijë shkëputja e tij. Nëse s’e bën këtë shkëputje, do të jetë tepër vonë në të ardhmen. Sepse këtë anomali që sjell kodi zgjedhor, këtë krizë të rëndë e zgjidh vetëm Meta duke u larguar nga koalicioni”, tha Ngjela.

Në lidhje me Bamir Topin, Ngjela e konsideron të rrezikshme pozitën e tij në koalicion me PS, sepse mund të kthehet në kingmaker, nëse ai merr inisiativa që opozita ende nuk i ka ndërmarrë.

“Bamir Topi nëse kalon majtas krijon rrezikshmëri edhe për PS, dhe për PD, sepse nëse opozita s’do ndërmarrë iniciativa, atëherë ato do i ndërmarrë Topi çfarë do e kthejë në kingmaker, gjë që nuk e do as PS dhe as PD. Aktualisht opozita nuk e ka iniciativën, por besoj do e marrë së shpejti”, tha Ngjela. K.C.