Pas Brukselit janë SHBA-të: Berisha, lëri të qetë anëtarët e KQZ-së!

Pas Brukselit që foli me gojën e zëdhënësit të komisionerit Fule lidhur me lojën e zëvendësimit të anëtarit të KQZ-së, vjen reagimi i Ambasadës së Shteteve të Bashkuara në Tiranë, dhe ky reagim është po aq i qartë sa dhe ai i Peter Stano-s. “Mirëpresim vendimin e sotëm për të shtyrë votimin e kuvendit mbi anëtarësinë në KQZ, dhe nxisim partitë politike që ta përdorin këtë kohë për diskutime konstruktive dhe konsultime të gjera”, thuhet në krye të deklaratës së tyre me këtë rast, duke lënë të kuptohet se ata e kanë marrë këtë shtyrje si shenjë të vullnetit të mirë, në një kohë që nuk ka qenë e tillë.

Dhe e mbyllin deklaratën duke bërë interpretimin e tyre të neneve të Kodit Zgjedhor: ”Për sa i përket përbërjes së Komisionit Qendror të Zgjedhjeve (KQZ), është me rëndësi të mbahet mend që anëtarët e KQZ-së – të cilët u përzgjodhën dhe u emëruan mbi bazën e konsensusit ndërpartiak në përputhje me Kodin Zgjedhor – konsiderohen se janë apolitikë. Me t’u emëruar, anëtarët e KQZ-së janë betuar, dhe janë të detyruar, që të kryejnë detyrat e tyre për të realizuar zgjedhje të lira, të ndershme e demokratike në Shqipëri. Duke pasur parasysh një kontekst të tillë – si dhe për hir të qartësisë morale – ne nxisim të gjitha aktorët politikë që të riafirmojnë përkushtimin e tyre të shpallur ndaj integritetit dhe transparencës procedurale kur shqyrtojnë çfarëdo veprimi të mundshëm lidhur me përbërjen e KQZ-së.”

Re.Pu.