Polici i kapur me një ton drogë, PD akuzon linjën e trafikut që shkon deri tek Tahiri. Mirë, po pse u arrestua?

Arrestimi i djeshëm në Gjirokastër i një punonjësi policie, Ardian Serezi, me 1 ton drogë, ka nxjerrë në konferencë për shtyp ish ministrin e Brendshëm, deputetin e PD-së Flamur Noka, që deklaroi se i arrestuari është i afërt me ministrin e Brendshëm, Saimir Tahiri. “I ndaluari i djeshëm, banor i Kombinatit njihet për raportet e ngushta që ka me Tahirin, veçanërisht në fushatën e fundit elektorale, ku shërbente edhe si shoqërues i Ministrit të Brendshëm”, theksoi Noka, duke shtuar se droga e sekuestruar tregon qartë që linjat e trafikut të drogës të lidhura direkt me ministrin janë vendosur, dhe se ky mekanizëm, vërteton edhe një herë shqetësimin e autoriteteve italiane dhe greke për sasinë e marramendëse të drogës që po mbërrin nga Shqipëria në shtetet fqinje. Më pas, ministria e Brendshme doli me një deklaratë ku theksoi vendosmërinë për të mos bërë asnjë kompromis në kurriz të ligjit dhe shtetit ligjor. “Ministria e Punëve të Brendshme dëshiron të sigurojë opinionin publik se askush dhe asgjë nuk do mund t’a ndryshojnë vullnetin e plotë të Qeverisë Shqiptare për të luftuar krimin e organizuar dhe korrupsionin”.  

Noka, për të ilustruar qëndrimin e tij, kishte një foto të Tahirit nga fushata, dhe diku në një cep të të pranishmëve shënohej me shigjetë i arrestuari. Por megjithë ilustrimin e Nokës, logjika e thjeshtë ta kërkon ngritjen e një dyshimi: Nëse polici në fjalë do ishte kushëri a mik, a fushatist i besuar dhe pjesë e rrjetit të drogës së ministrit, si ndodhi që u arrestua, pikërisht me një ton hashash? Mos ca segmente policore në Gjirokastër janë jashtë kontrollit të mazhorancës; mos e arrestoi vetë Tahiri për të na hedhur hi syve? Mbase Noka e sqaron këtë në një dalje të dytë.

a.k