Lajme

E kapur gafil me aferën e tenderit për Lotin 1 të Unazës së Madhe, qeveria u shfajësua me argumentin se ndryshe nga qeveritë e kaluara reagoi dhe anulloi tenderin, ndërsa ministri përgjegjës Damian Gjiknuri bëri të paditurin kur u pyet nëse kishte dijeni qeveria se kush fshihej pas kompanisë DH Albania me përfaqësues ligjor 26 vjeçarin recepsionist Avdjol Dobi. Ministri madje tha se se po përpiqej të kuptonte kush qëndronte pas dy tenderave 30 milionë euro të fituara nga një kompani e themeluar vetëm në 25 qwrshor, e cila rezultoi me dokumentacion të falsifikuar.

Servilët kanë nisur të dalin nga kllapia e ditëve të para. Ditëve kur mediat e pushtetit nuk dinin se çfarë të thoshin për protestën, për studentët. U zgjatën, në majë të gishtave, kryeministri i pari si më skërfyelli i të majtës, për të parë ndonjë Luli, apo ndonjë Monika në turmë. 

Në Bruksel dështoi një tentativë e shefes së Bashkimit Europoian Federica Mogherini për të bindur Prishtinën të anullojë tarifën doganore për mallrat serbe.  Mediat raportojnë se në përfundim të takimit të radhës të Këshillit të Stabilizim-Asocimit ndërmjet Kosovës dhe Bashkimit Evropian u anulua një konference e përbashkët e shefes së politikës së politikës së Jashtme Federica Mogherini  me kryeministrin e Kosovës, Ramush Haradinaj.

Mijëra hungarezë dolën në rrugët e Budapestit për të protestuar kundër ligji të ri të punës, por edhe qeverisjen gjithmonë e më autoritare të kryeministrit të djathtë, Viktor Orban.

Ky ishte demonstrimi i katërt në një javë me pjesëmarrjen e partive të krahut të majtë, organizatave studentore dhe qytetarëve të opozitës të cilët kundërshtojnë qeverinë e konservatorit Orban.

Sinqerisht mezi po pres fushatën. Dua të shoh çfarë alternativash të reja ka që edhe unë të mësoj dhe të shoh çfarë duhet të bëjmë më mirë

Kështu deklaroi në daljen e fundit në “E diela shqiptare”, kryebashkiaku i Tiranës Erjon Veliaj. Zoti Veliaj madje ka shtuar se ai e ka me shumë pasion punën që bën. Një deklaratë e cila lë të kuptojë se z. Veliaj e konsideron veten si kandidatin e Partisë Socialiste për zgjedhjet vendore të vitit 2019.

Kolegji i Posaçëm i Apelit ka shkarkuar sot nga detyra kryetarin e Gjykatës Kushtetuese Bashkim Dedja. Trupa e përbërë nga Ardian Hajdari, Luan Daçi, Albana Shtylla, Natasha Mulaj dhe Rezarta Schuetz arritën në përfundimin Bashkim Dedja nuk justifikon pasurinë dhe nuk ka nivelin e besueshëm për të vijuar detyrën.
Çështja erdhi në Kolegj pas ankesës së Komisionerit Publik pasi Dedja kishte kaluar provën në Komisionin e Pavarur të Kualifikimit. 

Për protestën e studentëve ka folur sot në gazetën “Dita” historian dhe studiuesi Pëllumb Xhufi, që qysh në hapje e quan atë një lajm të mirë, apo si të vetmen protest demokratiek të viteve të fundit. Sipas Xhufit përgjegjësia për shkatërrimin e universitetit fillon me Partinë Demokratike që e plaçkiti atë duke caktuar aty militantët e vet të përjetshëm. Por PS-ja nga ana e vet ka përgjegjësinë e vet sidomos me ligjin “Për Arsimin”, miratuar në vitn 2015.

Bashkësia ndërkombëtare aprovoi manualin që do t'i japë jetë marrëveshjes së Parisit për klimën, por pa objektiva më ambicioze për veprim të shpejtë kundër ngrohjes globale, pavarësisht alarmit se jeta në Tokë kërcënohet nga fatkeqësi.

Rregullat Zbatuese të Marrëveshjes së Parisit ishin objekt i një pune trevjeçare që u diskutua në 14 ditët e fundit në Katovicë të Polonisë. Ato përmblidhen në një tekst prej njëqind faqesh që përcakton se si duhet të zbatohet nga vendi, duke ofruar njëfarë fleksibiliteti për vendet në zhvillim.

Në një intervistë për Zërin e Amerikës, një ndër analistët e Gallup, Jon Clifton shprehet se tendenca e lëvizjes demografike në Shqipëri është shqetësuese jo vetëm pse njerëzit duan të ikin, por edhe sepse ata që duan të vijnë janë të paarsimuar dhe pleq. Me 60% të njerëzve që duan të ikin, vendi ynë renditet i katërti në botë për prirjen emigruese.