Reagimi ‘i përulur’ i MPJ-së për vrasjen e të burgosurit shqiptar në Greqi

Ministria e Punëve të Jashtme ka kërkuar përmes ambasadës tonë në Athinë dhe Konsullatës në Selanik që të ndjekin nga afër dhe në rrugë institucionale situatën, pas vdekjes së një të burgosuri shqiptar nga dhuna.

Reagimi i MPJ-së në fakt është “i përulët”, pasi në fillim “dënon sulmet ndaj autoriteteve të zbatimit të ligjit” (duke iu referuar vrasjes së gardianit të burgut nga i burgosuri?) dhe më tej shton, “sikundër çdo akt dhune ndaj shtetasve shqiptarë që kryejnë dënimin në burgjet e Greqisë”. Edhe pse një reagim i tillë mund të konsiderohet formalisht në rregull, deklarata nuk vë theksin aspak tek ngjarja (vdekja e shqiptarit nga dhuna).

Ilir Kareli (Kudret Kume) u gjet i vdekur në qelinë e tij ditën e djeshme në burgun e Nigrita. Raporti mjeko-ligjor dëshmon se vdekja e tij ka ardhur për shkak të dhunës së ushtruar me mjete të forta.

Deklarata

Shprehim ngushëllimet për humbjen tragjike të jetëve të gardianit të burgut të Malandrinos në Greqi, Jorgos Cironis, dhe të shtetasit shqiptar Ilia Kareli që vuante dënimin në këtë burg. Pas marrjes së njoftimit në rrugë zyrtare, MPJ ka kërkuar përmes Ambasadës tonë në Athinë dhe Konsullatës në Selanik që të ndjekin nga afër dhe në rrugë institucionale situatën. MPJ dënon sulmet ndaj autoriteteve të zbatimit të ligjit sikundër çdo akt dhune ndaj shtetasve shqiptarë që kryejnë dënimin në burgjet e Greqisë. Inkurajojmë dhe kërkojmë nga autoritet greke zbardhjen e plote të ngjarjes, çka do të mundësonte vendosjen përpara drejtësisë  të përgjegjësve.

S.S