Kosova e luftëtarëve të zhgënjyer e të traumatizuar. “Liderët jetojnë në vila e ne vdesim urie”, thotë njëri syresh

Në çdo vend, zhgënjimet dhe vuajtja e bijve të luftës a të revolucionit janë një temë e pashmangshme: Është konflikti i përhershëm mes atyre që bëjnë luftën në terren dhe atyre që korrin frytet. Në Kosovë ky element ka marrë nota dramatike e shpesh tragjike, për shkak edhe të një vend të varfër që u gdhi edhe i shkatërruar nga lufta. Siç njoftojnë sot mediat pas një raportimi të shtypit të Prishtinës, 45 vetë, ish luftëtarë të UÇK-së, kanë vrarë veten në pamundësi për t’u siguruar familjeve një mbijetesë minimale, mbivendosur kjo traumave të luftës. Por edhe ata që janë gjallë nuk e fshehin revoltën dhe pakënaqësinë, siç njofton Koha ditore. Ish-luftëtari i UÇK-së, Selman Avdiu, nga fshati Abri e poshtme e Skenderajt, ka protestuar para Qeverisë së Kosovës bashkë me gruan dhe 4 fëmijët e tij duke kërkuar që Qeveria t’i gjejë zgjidhje për një shtëpi. Ai jeton me qera që prej kohës së luftës kur banesa i është djegur. “Pas luftës do ta bëjmë të re”, nuk ka funksionuar në rastin e tij. Dhe Avdiu është i qartë: Do të protestojë vazhdimisht nëse Qeveria nuk i bën zgjidhje që atij t’i sigurojë kulm mbi kokë. “Kam pritur mjaft, ka 14 vjet që po pres, por nuk po marr ndihmë nga askush. Këta janë përfaqësuesit e popullit dhe duhet të mendojnë për popullin sepse morën votën tonë. Këta jetojnë nëpër vila luksoze derisa ne vdesim urie dhe pa kulm mbi kokë”, thotë Avdiu.
 

a.k