Ka vdekur zonja e hekurt, Margaret Thatcher

Ka vdekur Margaret Thatcher, gruaja e parë dhe e vetme britanike që ka hyrë në Downing Street nr. 10. E mbiquajtura “Zonja e Hekurt” ka qenë kryeministre për 11 vite me radhë, nga 1979 deri në vitin 1990. Do të mbahet mend për vendosmërinë, me të cilën sillej në momente të forta krizash e dramash. Në vitin 1980, disa terroristë arabë pushtuan ambasadën iraniane, dhe kërcënonin me hedhjen në erë të ambasadës, nëse nuk lirohehsin 91 arabë të burgosur në Iran. Ajo s’pranoi asnjë kompromis. Po kështu bëri një vit më vonë përballë një greve urie të disa përfaqësueve të IRA-së që donin t’u njihej statusi i ish të burgosurëve politikë. As që bëhej fjalë. Më 1982 ajo u bë “heroina” e Falkland-it. Më 1984 u përball egërsisht me minatorët e me sindikatën e tyre, por doli gjithnjë e saja. Më 1985 i bënë atentat njerëzit e IRA-s, por ajo nuk refuzoi të mbante fjalimin e vet pranë vendit të atentatit, ku mbahej kongresi i konservatorëve. E kështu me radhë, deri në vitin 1990. Kur mbylli derën e zyrës kryeministrore për herë të fundit, ajo ia shkrepi të qarit.

Meryl Streep luajti rolin e saj në një film shumë të vlerësuar e ndjekur që doli nëpër kinematë e botës në vitin 2011, por Thatcher ka pak gjasa që ta ketë parë. Ajo kish kohë që ish sëmurë rëndë. Vuante, kështu ka thënë e bija, nga demenca senile.

Re.Pu.