Bujar Bukoshi në vitin 2005: Rugova është një kukull në duart e mafias familjare

Ibrahim Rugova është ndarë nga jeta në janar të vitit 2006, por sot, gazeta Express ka publikuar një intervistë të Bujar Bukoshit dhënë një vit përpara vdekjes së tij. Është një intervistë e dhënë saktësisht më 3 shkurt 2005, për gazetarin Burim Etemaj, në gazetën Epoka e Re, dhe aty thuhen gjëra jo fort të këndshme për Rugovën, atëbotë President i Republikës së Kosovës. Nga intervista rezulton se Uka, i biri i Rugovës që është ndaluar sot nga Eulex-i, ka qenë, sipas Bukoshit, problematik qysh atëherë. Ja ç’thotë fjalë për fjalë ai:

“Për kuadrin e LDK-së kanë vendosur strukturat paralele të LDK-së, ato që janë të përfshira në mafiozitet. [Rugova] është i përfshirë në një mafie familjare, në një “cosa nostra” dhe shërben si mbulesë e saj. Ai përdoret si fasadë, për të fshehur prapa një grup njerëzish të korruptuar, të cilët i përdorin parat e buxhetit të Kosovës, sidomos përmes tenderëve, për shpërdorime të ndryshme. Përgjegjësia e tij është se ai i shërben këtij grupi njerëzish dhe ai përdoret prej tyre si kukull. Ai është president-kukull, me të cilin luajnë njerëz nga prapaskena.

Unë e kam njohur dhe e njoh Rugovën, dhe ju them me bindje të plotë se ky njeri ka degjeneruar në një kryetar fisi. Thonë se karakteristikë e politikanëve të dështuar ose e politikanëve që gjenden para dështimit është shurdhimi dhe verbërimi i qëllimshëm. Tipari kryesor në figurën e tij prej fillimit mbetet pasiviteti thuajse i plotë politik, dhe shpesh ai tash të jep përshtypjen e një figure që jeton në botën e mitologjisë, që nuk jeton më në botën e halleve, problemeve dhe sfidave me të cilat përditë ndeshen qytetarët e Kosovës. Ai gjoja predikon shtetin ligjor ndërsa në fakt është shkelësi më flagrant i tij. Me mbajtjen e dy posteve, atë të kryetarit të partisë dhe atë të presidentit ai e humbi kredibilitetin e figurës së unitetit të popullit në Kosovë. Ç’është e keqja, ai ka futur në jetën tonë politike edhe disa dukuri të pashembullta dhe të palejueshme: papërgjegjësinë, mospërfilljen, megalomaninë, dhe sidomos deliriumin e madhështisë. E shihni, se sipas shembullit të Rugovës dalin imitatorët edhe nga partitë e tjera, kur shihet se askush nuk do të japë përgjegjësi për asgjë.”

Intervistën të plotë mund ta ndiqni në linkun http://www.gazetaexpress.com/?cid=1,13,133830

Re.Pu.