Berlusconi vijon me batuta të pashijshme macho-iste

Silvio Berlusconi nuk resht me mufkat e tij prej maskilisti. Madje, kjo fushatë elektorale, ngaqë mund të jetë e fundit, e gjen shumë të eksituar. Dhe në fakt nuk duket se ka arsye të heqë dorë prej këtij stili anektodik, me të cilin mbush veprimtaritë e tij publike e politike. Nuk ka arsye, pasi është një stil që e shpërblen me mbështetje elektorale.

Së fundmi u ndodh në një takim elektoral, në Mirano, diku afër Venecias. “Për dreq”, në skenë u gjend me një grua të re e të hijshme. Kaq i duhej. Filloi nga batutat. “Ti e arrin orgazmën?”, “E arrin, apo jo?”, “Sa herë e arrin?”, “E arrin disa herë gjatë një akti?”, “Po me çfarë frekuence e arrin?” – të gjitha këto ishin pyetje me breshëri që Berlusconi ia bënte Angela Bruno-s nën shoqërinë e të qeshurave në sallën e mbushur plot. Gruaja e re u përgjigjej të gjitha pyetjeve, por dukej se ish në siklet. Por sikletin më të madh ia dha një reagim, që u shpërnda për shtypin nën emrin e saj, në të cilin ajo thosh se “ish ndjerë e nderuar, e jo e sikletosur”.

"Gazetat po më lënë pa mend e pa gojë. Po lexoj fjalë që më atribuohen mua, por që në fakt nuk kanë dalë nga goja ime. Dhe prandaj po lëshoj të parën deklaratë me këtë rast. Batutat e Kavalierit më kanë dhënë veç siklet, n’daçi si grua, n’daçi si nënë”.

Re.Pu.