Intervista/Kryeministri: “Mediat nuk i kam në llogari. Gjyqësori, turpi ynë. Video e Sejdinit, jashtë kontekstit. PD në drejtim të paditur”. Fevziu: “Qenke lodhur shumë në 2 vjet”

Intervista e sotme e kryeministrit të Shqipërisë Edi Rama, në emisionin “Opinion” ka sjellë një dëshmi të problemit serioz të komunikimit mes tij dhe një pjese të publikut. Duket se çdo kritikë apo akuzë që ngrihet në media apo nga opozita, nuk qëndron. Dhe kjo për arsyen e thjeshtë se ato bëhen ndaj Aleancës për Shqipërinë Europiane apo se vijnë nga SHQUP-i. Të inkriminuar në fushatë? “Nuk ka asnjë të dënuar, asnjë. Këto janë gjueti shtrigash”. Rasti Sejdini? “Dua të shoh videon të plotë që të flas. Është nxjerrë nga konteksti”. Po çfarë pret kryeministri që të shohë videon, apo është në besën e florinjtë të fjalës së Qazim Sejdinit? Media? “As i kam në llogari mediat për kritikën që bëjnë. Jam vetë një media e vetëmjaftueshme. Nuk e lë veten në dorën tuaj. Nuk mund të thotë askush që qeveria bën presion”. Nga ana tjetër, kjo shpërfillje shpërfillet kur kritikat për gazetarët i ka pa hesap. Deklaratat pa takt për gratë? Ashtu siç ato mund të kuptohen nga shumëkush? “Këto janë turpe. Këto që them për gratë i ka thënë Çajupi, sepse unë mendoj se gratë janë një forcë e madhe transformuese”. Mallkimet e Konispolit? Ato kryeministri i ka përsëritur sërish në studio, sepse ka deklaruar se në Konispol po kërkohet të bëhet një politikë që do t’i kushtojë Shqipërisë. Dhe për çudi kjo politikë nxjerr krye kur në Sarandë duket Edi Rama me Shpëtim Idrizin. E teksa flet për një opozitë që po ikën në drejtim të paditur, kryeministri vijon çuditërisht me akuzat, të cilat janë të vetmet që flasin për një qëllim politik. Por edhe për pasiguri. Një rrufe lëshoi kryeministri edhe për gjyqësorin, që e quajti turpin e Shqipërisë, e që i cili do të përfshihet nga një reformë që do ta tundë nga themelet. Me sa duket Shqipërisë i ka mbetur vetëm PS-LSI dhe PDIU si njësi që e kanë për zemër dhe që dinë ta çojnë vendin përpara. Nga ana e vet, gazetari Fevziu i ka shprehur në fund të emisionit një konsideratë personale Edi Ramës: “Në dy vjet e gjysmë jeni lodhur shumë z. Rama”.
s.z