Intervista e kryeministrit: Erdha, fola ça desha, ika. Pyetja e pazakontë: “Mund të jeni i frikësuar nga një fitore e thellë...”. Përgjigja: “Fitoren e vendosin njerëzit”. Investimet? “Jemi në rrugën e duhur”

Edi Rama, që është kryeministër në këtë vend, ka dhënë sot një intervistë për emisionin “Top-Show”, ku ka folur vetëm për çështje të axhendës së tij dhe të shumicës që përfaqëson, por jo për ato tema që janë debat i ditës në Shqipëri. Edhe brenda këtij kuadri, bien në sy dy pyetje, që e nxjerrin intervistën gati në kufijtë e artificiales: Pyetja e parë: “Në prag të këtyre zgjedhjeve mund të jeni i frikësuar për dy gjëra. Pika e parë, që fitorja do të jetë aq e thellë sa do të keni një barrë të madhe për të qeverisur më pas...”

Përgjigja: “Fitoren nuk e vendosim ne, por njerëzit. Përderisa kam marrë përgjegjësinë për të drejtuar këtë parti dhe qeveri nuk më tremb besimi i njerëzve, përkundrazi më motivon. Ne na takon të jemi në nivelin e besimit të tyre”. Pyetja e dytë, që vjen në konradiktë me të parën: “Pika e dytë, sondazhet jo gjithmonë tregojnë të vërtetën. A keni frikë nga një rezultat befasues?”
Përgjigja: “Sondazhet vlejnë për aq sa vlejnë. Ne bëjmë sondazhe prej shumë kohësh. Ne kemi bërë sondazhe me publikun në lidhje me çështje të ndryshme, dhe e dimë shumë mirë se si është mbështetja ndaj nesh. Për këtë arsye nuk jemi të frikësuar. Unë e kam bindjen se shqiptarët duan reforma dhe i mbështesin ato kur ato janë reale, por nuk ka reforma pa kosto. Më thoshin ndale reformën e energjisë, por 80% e shqiptarëve e kanë mbështetur atë që ne kemi bërë me energjinë. Ndërkohë, 90% e shqiptarëve kanë mbështetur mbylljen e universiteteve, njerëzit tashmë janë të vetëdijshëm”. Të vihet re sesi kryeministri masat represive të marra për shlyerjen e borxheve i quan reformë. Po kështu ky kryeministër flet për mbylljen e universiteteve, ndërkohë që i ka rihapur thuajse të gjitha nga e para. Kur vjen puna te rritja ekonomike, kryeministri ka dalë edhe kundër FMN-së, teksa ka deklaruar se rritja ekonomike do të jetë 2,5-3%. Investimet? Përgjigja është origjinale dhe i duhet bërë “like”: “...Këtë vit ne presim një bum të rritjes së eksportit në bujqësi. Ne duhet të rrisim investimet e huaja, por investimet reale të huaja kërkojnë një fazë përgatitore. Të gjitha këto së bashku, nuk janë arsye që ne kemi arritur në destinacion, por ne jemi në rrugën e duhur. Një kancer nuk kapërcehet me aspirina, por do agresivitet për ta mundur sëmundjen...”.

http://top-channel.tv/lajme/artikull.php?id=301077#k1

s.z