M. Nano i përgjigjet lexuesit Albi

Lexuesi Albi ka lexuar shkrimin tim me titull ‘Wollfarth-i ka të drejtë lidhur me Spahiun. Por …’, dhe nuk është në një mendje me mua lidhur me diçka. “A është e drejtë që personat me post politik të bëjnë politikë??? Ti as nuk e di çfarë shkruan. Apo jo Muç?”, thotë ai. Mirëpo Albi ose s’më ka kuptuar, ose bën sikur s’më ka kuptuar. Askush nuk e pengon Sali Berishën të sillet si shef i maxhorancës, rrjedhimisht të thotë ndonjë gjë në adresë të kundërshtarit të vet, por puna është se këtë gjë nuk duhet ta bëjë në zyrën e kryeministrit. Në zyrën e kryeministrit ai është thjesht kryeministër, dmth paguhet me paratë tona për të qeverisur vendin, e jo për të sharë Edi Ramën, prokuroren, presidentin, Kreshnik Spahiun, etj. Ndërsa kryetarja e parlamentit, sipas ‘deontologjisë’ së postit që mban e sipas praktikave në vendet normale të botës, nuk duhet të ngatërrohet haptazi me dialektikën maxhorancë-opozitë. Pseja është e thjeshtë. Ajo është kryetarja e parlamentit, e të gjthë parlamentit, e maxhorancës dhe e opozitës, e prandaj duhet të sillet në mënyrën më të balancuar të mundshme në të gjitha shfaqjet publike. Përsa kohë është në atë post, kuptohet.
Sa më sipër nuk është se po i shpik unë. Këto i thotë logjika më së pari, dhe teoria e praktika e demokracisë liberale më së dyti.