Mandati i Kokëdhimës

Partia Demokratike ka deklaruar se do t’i drejtohet Gjykatës Kushtetuese për të kërkuar heqjen e mandatit të deputetit, Koço Kokëdhimës. Motivi gjendet në nenin 70, pika 3 të Kushtetutës, i cili përcakton se: “Deputeti nuk mund të kryejë asnjë veprimtari fitimprurese që buron nga pasuria e shtetit apo pushtetit vendor dhe as të fitojë pasuri të këtyre”. Kurse në pikën 4, ky nen i Kushtetutës përcakton heqjen e mandatit të deputetit “në rast se shkelet pika 3 e tij”. 

PD-ja i referohet 170 e më shumë tenderëve të fituar nga “Abissnet”, shoqëri e Koço Kokëdhimës që merret me shërbimin e internetit. Shoqëria “Abissnet” i është përgjigjur ndër rreshtat e “Shekulli Online” me një përgënjeshtrim ku rëndësi i jepet dy fakteve:

1. “Abissnet” nuk është më në duart e Koço Kokëdhimës që prej 6 shkurtit 2014

2. “Abissnet” ka "luftuar me forcat e saj", me procedura tenderimi sipas rregullave dhe ka arritur të fitojë me çmim të ulët në shumicën e tyre.

Nuk jemi në gjendje për të analizuar saktë e në detaje pikën 2 (në shtete si Franca ka gjykata të posaçme për të bërë këto verifikime financiare, siç ka ndodhur në rastin e Serge Dassault, një miliarder francez, të cilit iu hoq mandati, sepse kishte influencuar votën duke falur para disa të varfërve në zonën e tij elektorale!!!).

Por në lidhje me pikën 1, i hodhëm një sy të shpejtë faqes së QKR-së, ku kërkuam gjendjen aksionere të shoqërisë : “Abissnet”.  Ja çfarë gjetëm:

1. Më 7 shkurt 2014, “Abissnet” kalon në pronësi të shoqërisë “2K Group”, në kuotën 100% të aksioneve. Ortaku i mëparshëm ishte Koço Kokëdhima.

2. Më 23 tetor 2013, shoqëria “2K Group” kalon në duart e tre aksionerëve të rinj. Deri më këtë datë shoqëria ishte e tëra nën pronësinë e Koço Kokëdhimës.

Aksionerët e rinj janë:

a) Enkeleda Pura, e cila tashmë zotëron 35% të aksioneve.

b) Herjeta Deliaj, që zotëron 30% të aksioneve.

c) Ylli Alimemaj, i cili zotëron 35% të aksioneve.

Kush janë këta të tre? U informuam në ambientet e “2K” dhe rezulton se të tre janë të punësuar të Koço Kokëdhimës në rolet e mëposhtme:

Enkeleda Pura është drejtoresha e Burimeve Njerëzore

Herjeta Deliaj është juriste dhe Ylli Alimemaj është financier.

Jemi të mendimit që “Vodafone” duhet të punësojë Koço Kokëdhimën në reklamën e fundit të zemërgjerëve.  

P.S:  “Abissnet” ka një kapital prej 5 miliardë lekë të vjetra, ndërsa “2K Group” prej 300 milionësh. Bëjini vetë hesapet.