Qëndrimi që po mban Shqipëria ndaj agresionit ushtarak në Ukrainë

Lajmi se Rusia do të ndërhyjë ushtarakisht në Ukrainë ka sjellë reagimin e menjëhershëm të liderëve botërore dhe të shteteve të ndryshme anëtare ose jo të Bashkimit Europian dhe NATO-s. Në listën e reagimeve është renditur edhe Shqipëria, që mbrëmjen e djeshme ka mbajtur një qëndrim zyrtar përmes Ministrisë së Punëve të Jashtme.  Në këtë çështje me përmasa ndërkombëtare, “pesha” e Shqipërisë sigurisht që është e vogël, edhe pse anëtarësia në NATO na bën domosdoshmërisht pjesë të vendimmarrjeve e ndoshta edhe të kontributit.

“Ministria e Punëve të Jashtme e Republikës së Shqipërisë shpreh shqetësimin e saj të thellë për përshkallëzimin e situatës në Ukrainë. Ministria e Punëve të Jashtme çmon rëndësinë e patjetërsueshme të integritetit territorial dhe unitetit të Ukrainës. MPJ beson se respektimi i së drejtës ndërkombëtare, marrëveshjeve të nënshkruara dhe evitimi i përdorimit të forcës, që sjell me vete efekte destabilizuese për Ukrainën dhe sigurinë ndërkombëtare, është kuadri i vetëm që ofron zgjidhje të situatës. Ministria e Punëve të Jashtme shpreh besimin se një veprim i sinkronizuar dhe vendimtar i bashkësisë ndërkombëtare është kyç për stabilizimin e situatës dhe për krijimin e frymës së besimit” thuhet në reagimin e thatë dhe me pak shpjegime mbi atë që po ndodh. Njoftimi i Ministrisë së Jashtme mund të lexohet si një qëndrim tipik i një diplomacie të "druajtur", sepse në asnjë rresht të saj nuk përmenden termat “Rusi”, “Krime” apo “agresion ushtarak” por vetëm bëhet me dije se në Ukrahinë kemi një situatë të përshkallëzuar.

Më i drejtëpërdrejtë ka qenë ish-kryeministri shqiptar Sali Berisha.  Në një reagim ai e ka krahasuar agresionin e Putinit me agresionin e Hitlerit ndaj Çekosllovakisë. “Të dashur miq, pushtimi i Krimese nga Putini të kujton pushtimin e Çekosllovakisë nga Hitleri dhe më vonë nga Brezhnievi. Ju ftoj ta dënojmë këtë agresion ndaj një vendi të lirë me forcën tonë më të madhe. Ky agresion është një dhunim flagrant i ligjit ndërkombëtar, kartës së OKB, OSBE dhe memorandumit të Budapestit për Ukrainën të firmosur nga SHBA, Britania e Madhe por dhe vetë Rusia. Me agresionin kundër Ukrainës dhe pushtimin e territoreve të gjera të saj, Kremlini hapi siparin e pushtimeve të tjera për rikthimin e perandorisë ruse” shkruan ish-kryeministri Berisha në profilin e tij në “Facebook”.

Në të njëjtin rrjet social ka reaguar edhe ish-Ministri i Jashtëm, Tritan Shehu, sot deputet i Partisë Demokratike. Reagimin e tij ai e nis me një pyetje retorike. “A nuk duket sot tejpamës insistimi i Presidentit Bush për të pranuar në NATO Ukrainën? Ngjarjet në Ukrainë po marrin një drejtim të rrezikshëm. Në disa aspekte të rikujtojnë të kaluarën, "luftën e ftohtë". Duhet një zgjidhje diplomatike. Fatmirësisht ne jemi anëtarë të NATO-s” shkruan Shehu. E në përgjigje të shqetësimit të komentuesve të tij për një luftë të re botërore, Shehu shprehet optimist se telefonata Obama-Putin, do të japë rezultatet e saj dhe problemi nuk do të arrijë deri në atë fazë.

k.k