Projekti “Jugosllavia e Re”, Demaçi thotë se shqiptarët s’kanë ndërmend të përfshihen

Në fillim të këtij viti, ndërsa doli lajmi se kryeministri shqiptar Edi Rama do të zhvillojë një vizitë zyrtare në Serbi, ish-kryeministri Sali Berisha denoncoi në media një projekt që po diskutohej në selitë diplomatike në Ballkan. Sipas Berishës, Mali i Zi ka hedhur idenë për krijimin e një Unioni Ballkanik, apo ndryshe të një “Jugosllavie të Re”. Kjo ide, sipas ish-kryeministrit ka si bashkësponsorizues komisionerin e BE për Zgjerimin Stefan Fule. Nisma që tani njihet si "Nisma e Gjashtëshes së Ballkanit Perëndimor " apo "BP6", synon të krijojë një bashkëpunim të gjithanshëm, të strukturuar dhe me projekte konkrete të përbashkëta. Sipas ish-kryeministrit, në të vërtetë, ndonëse ende jo i shpallur zyrtarisht por, Beogradi është parashikuar, të jetë “kryeqytet i nismës”.

Por vizita e Ramës në Beograd është shtyrë për në një moment tjetër dhe sipas pasardhësit të tij, tematikë e bisedimeve do të jetë edhe ky projekt. Idenë e përforcojnë deklarimet publike të Ramës i cili flet vazhdimisht për unifikimin e Ballkanit në një ofertë për investitorët e huaj dhe si një treg i vetëm. Këtë deklarim, Rama e ka përforcuar edhe gjatë fjalës së tij pak ditë më parë në Londër, ku mbahej tryeza e Bankës Europiane për Rindërtim dhe Zhvillim (BERZH).

Zërit kundërshtues të ish-kryeministrit shqiptar i është bashkuar edhe veprimtari i njohur Adem Demaçi. Duke folur për agjencinë e lajmeve “Presheva Jonë” Demaçi thotë se nuk është i shqetësuar me iniciativën e Malit të Zi për planin e quajtur “West Balkan Six “, pjesë e së cilës do të jenë: Shqipëria, Bosnja e Hercegovina, Mali i Zi, Kosova, Maqedonia dhe Serbia, iniciativë kjo përmes së cilës gjoja “synohet integrimi i përbashkët në Bashkimin Evropian”. Për Adem Demaçin, Jugosllavia që nga vitet 1945 e deri me 1990, për shqiptarët ka qenë njëra ndër regjimet shtypëse dhe me të egra.

“Neve nuk na intereson çfarë plane bëjnë të huajt, të tjerët. Ata kanë planet e veta, ne tonat. Puna e Jugosllavisë njëherë e përgjithmonë ka mbaruar dhe ne shqiptarët kemi derdhur gjak e më vonë kemi festuar që kemi dalë nga ajo. Madje jo vetëm shqiptarët, por edhe të tjerët kanë festuar që ishin viktimë e krimeve, masakrave persekutimeve, burgosjeve në atë “Jugosllavi” dhe mezi kanë pritur të dalin nga ajo. Për zhdukjen e asaj “Jugosllavie” nuk kishin punuar vetëm shqiptarët, por edhe komuniteti ndërkombëtar, sepse ai shtet me gjitha ato të zeza prishte edhe imazhin e Evropës”, ka thënë Adem Demaçi. Më tutje, ai ka shtuar se nëse shtetet sllave dëshirojnë që ta ri-jetësojnë këtë plan atëherë le ta bëjnë të vetme pasi shqiptarët nuk e kanë ndërmend të futen përsëri aty. “Ne nuk jemi sllavë, kush të dojë le të shkojë me atë farë Jugosllavie. Ne shqiptarët hyjmë në atë Jugosllavi, vetëm atëherë kur qarri do të bëjë dardha”, ka shtuar Demaçi. Pikërisht nën regjimin e asaj Jugosllavie, Adem Demaçi ka vuajtur 28 vjet në burg.

k.k