Fevziu analizon liderin e ri të PD dhe argumenton se “pse Basha nuk mund të jetë Berishë”

Lulzim Basha është vënë në qendër të disa analizave që po botohen në shtypin shqiptar, pas protestës së 20 shkurtit. Pas Edmond Tupes, që një ditë më parë vlerësonte lart edukatën e treguar në këtë protestë, është gazetari Blendi Fevziu që merr shkas nga ky zhvillim për të analizuar Bashën si kryetar të Partisë Demokratike. Në analizën e tij, Fevziu thotë se Basha nga protesta e 20 shkurtit ka prodhuar dy ndjesi të kundërta. ” Një pjesë u entuziasmuan dhe besojnë se kjo ishte dita që Basha u bë lideri i vërtetë i PD , por një lider me strategji ndryshe; të tjerët u trishtuan se Basha nuk u bë lideri që prisnin, nuk shpërtheu në denoncime ; nuk përmendi emra por foli për ligje dhe demokraci” shkruan Fevziu duke dhënë edhe përshtypjen e tij se të dyja grupimet, pak nga pak, janë gabuar. Sipas tij, problemi qëndron në faktin se të gjithë kanë në kokë modelin e një lideri opozite, Sali Berishën. Ndaj në këtë pikë, në analizë theksohet fakti “se Basha nuk mund të jetë Berishë”. “Basha nuk mund të jetë një Berishë, sepse në këto kohë, 23 vjet pas pluralizmit dhe në momentet që kemi dy ndryshime pushteti rresht paqësore, ai do të ngjante komik sikur të përdorte stilin dhe gjuhën e Berishës më shtator 1997. Basha nuk mund të jetë Berishë. Nuk e lejon koha dhe brezi të cilit i takon. Ai duhet të jetë lider për 68% të shqiptarëve, që sot janë nën 40 vjeç” shkruan Fevziu duke theksuar se Basha nuk bëhet dot Berishë e as po tenton të jetë ndryshe nga ai.  Sipas tij, Basha thjeshtë po jeton kohën e tij. E në fund të analizës së tij, Fevziu thotë se Basha duhet të krahasohet si kryetar me aksionin dhe produktin e tij e jo me Berishën e para 15 viteve.

Për më tepër http://www.panorama.com.al/2014/02/24/me-ke-duhet-krahasuar-lulzim-basha/

k.k