Deputeti i Kosovës: Në rekrutimin e të rinjve tanë për luftën siriane, ka gisht shërbimi sekret serb

Gazeta Dita ka botuar një shkrim të deputetit të parlamentit të Kosovës Ramiz Lladrovci, i cili trajton çështjen e luftëtarëve islamikë të Sirisë nga Kosova e Bosnja. Duke nënvizuar ashpërsimin e masave ligjore ndaj kësaj dukurie, autori gjithsesi pohon se “asgjë nuk ka ndryshuar; lëvizja islame, me tipare të forta tashmë vehabiste selafiste në Kosovë, sa vjen e bëhet më e pranishme, tonet e liderëve të saj, të njohur e të panjohur, po bëhen më të ashpra, prania e tyre në jetën e njerëzve është më e zëshme, dhe ndërkohë, ata po marrin primarin në disa nga eventet e jetës sonë”. Lladrovci bie dakord se shtysa për rekrutimin e këtyre të rinjve është shpërblimi monetar; por ai nxjerr dhe një element tjetër shumë domethënës, dhe këtu artikulli bëhet shumë interesant: “edhe në Bosnje, edhe në Kosovë, ka një passkenë që pak njihet: shërbimi i fshehtë serb. Të gjitha shënimet e shërbimeve të ndryshme të inteligjencës, të cilat kanë studjuar rritjen e lëvizjes vehabiste në Bosnje janë në një emërues të përbashkët: ndikimin e shërbimit të fshehtë serb në këtë proçes. Por, në Kosovë, kjo është edhe më e dukshme se në Bosnje, dhe ka një zanafillë që në ditët e para të pas luftës, përmes rekrutimeve të mëhershme. Shërbimi i fshehtë serb në Kosovë, përmes disa nga liderët e njohur, si Zdravko Tolimir, Dragan Stojmenoviç, Simon Tomanov, që ishte njëkohsisht edhe zevendësi i shefit të KOS-it, shërbimit të fshehtë ushtarak, Aleksandër Vasiljeviç, ndërtuan në Kosovë një rrjet bashkëpunëtorësh në mjedisin islam, shqiptar ose jo shqiptar, të cilët, të lidhur edhe me strukturat ushtarake të kohës, u bënë më pas edhe pjesë të politikës në Kosovë. Por edhe vendi ku, një pjesë e politikës së Kosovës, gjeti strehën e saj”.

Lexoni më shumë në linkun: http://gazetadita.al/sherbimi-sekret-serb-i-perfshire-ne-nje-projekt-per-goditjen-e-tolerances-nderfetare-shqiptare/

a.k