20 shkurt 1991. Ramiz Alia: “Të mbrohet! Të qëllohet...Monumenti u rrëzua”

Sot opozita ka paralajmëruar protestën e vet me rastin e rrëzimit të monumentit të Enver Hoxhës. Partia Demokratike pretendon se drejtuesit e saj kanë firmën e tyre në këtë ngjarje të 20 shkurtit 1991, e cila ndau simbolikisht Shqipërinë nga diktatura e Enver Hoxhës. Në këtë kuadër, po sot, gazeta “Panorama” zbardh një pjesë nga kujtimet e Qemal Lames, ish-kryetarit të Hetuesisë së Përgjithshme në fundin e komunizmit. Dhe zbardh pikërisht debatin e zhvilluar në Plenumin e Komitetit Qendror për këtë situatë të vështirë në atë kohë. Siç mund të lexohet, Ramiz Alia ka urdhëruar të qëllohet për mbrojtjen e monumentit dhe krahas tij, me të njëjtin mendim janë shprehur edhe Haxhi Lleshi dhe Zylyftar Ramizi, dy persona për të cilët Lame shprehet se flisnin për herë të parë në Plenum, “pasi zakonisht ishin të heshtur”. Madje Haxhi Lleshi akuzonte Manush Myftiun dhe Rita Markon se sjellja e tyre për të mos qëlluar lidhej me faktin se “ata kishin fëmijët me Partinë Demokratike”. Ja një sekuencë e mbledhjes e cila ka brenda edhe një lloj humori të zi:

“Kundër popullit nuk mund të qëllohet”,- tha Muntaz Dhrami. “Këtë nuk mund të bëjmë”.

Ndërkohë nga dera përballë hyn Nexhmedin Dumani, ndihmësi i Ramiz Alisë dhe i vuri një letër mbi tavolinë.

“...Presin përgjigje në Ministrinë e Brendshme se si të veprojnë. Të mbrohet”, -tha Ramizi.

Pas pak Nexhmedini erdhi përsëri dhe vuri mbi tavolinë një shënim tjetër.

-Përsëri kërkojnë mendim për përdorimin e armëve. Nuk e përballojnë dot presionin.

Ramizi u mendua për disa çaste dhe tha: “Të qëllohet”.

-Ju lumtë”,- pasuan menjëherë me zë të përbashkët, si në kor të orkestruar, Haxhi Lleshi, Spiro Koleka, Haki Toska. “Nuk kemi çfarë të presim më”.

Disa momente më pas erdhi përsëri Nexhmedini dhe la mbi tavolinë një letër tjetër. Ishte ora 14:05.

“Monumenti u rrëzua”,-tha Ramizi. 

s.z