Ekipi në pozitën më të rëndë të 23 viteve, tifozët e Tironës fajësojnë kryebashkiakun Basha

Tirana ndodhet në vendin e fundit të Superligës së futbollit shqiptar. Kjo renditje e paprecedentë që i bën të druhen se ekipi mund të pësojë kalvarin që vuajti Partizani për vite të tëra dhe tani Dinamo, ka bërë që mbi 100 tifozë të ekipit të protestojnë pasditen e sotme për gjysmë ore para bashkisë së kryeqytetit. Tifozët kanë akuzuar kryetarin e Bashkisë së Tiranës, Lulzim Basha, si njeriun që ka prishur ekipin e futbollit. Bashkia ka në pronësi klubin, i cili sot ndodhet në pozitën më delikate të këtyre 23 viteve. 
“Basha ti shkatërrove ekipin e futbollit”. “Basha mbaji premtimet e bëra”. “Basha të zgjidhë krizën e ekipit të futbollit”, janë disa nga parrullat që kanë hedhur tifozët gjatë protestës së tyre. Asnjë zyrtar i Bashkisë së Tiranës nuk ka dalë që t’i takojë ata, ndërkohë që mediat njoftojnë për një përplasje të shkurtër me policinë e kryeqytetit.

a.k