M. Nano u përgjigjet lexuesve

Në fund të shkrimit “Ç’bëhet kështu? TV Klan-in e kap tërbimi nga një foto e Man Ray-it” ka ndonjë koment, nga i cili del që autori i tyre është më shumë i zemëruar me Ramën që medemek provokoi me atë foto nudo të Man Ray-it se sa me TV Klanin që e nxorri lajm të parë në ditarin e mbrëmjes si një lapërdhí kolosale. Tani, të rrimë shtrembër e të flasim drejt, për gjetjen e Ramës mund të diskutonim para se të dilte dacibao-ja e Klanit; e mund të thoshim, e shumta, që ai nuk ka qullosur gjë këtë herë, pasi fotoja nuk ka lidhje me festën (vërtet ka njerëz që mendojnë se mund të thoshim më shumë se kaq?); por me të ndjekur lajmin tek Klani nuk mund ta kesh mendjen më tek vëzhgimi delikat e nazik mbi këtë gjetje-kartolinë. Në plan të parë del talebanizmi i frikshëm (në televizionin ABC kishin intervistuar dhe njerëz, të cilët shprehnin indinjatën e tyre mbi këtë ‘ndyrësi’ të radhës të Ramës). Ku jetojmë kështu? Ç’mut vendi është ky? As kaq gjë nuk dimë e nuk duam të ndajmë? Mos qenka e thënë të mbytemi edhe me një pikë ujë? Apo mos kemi të bëjmë njimend me një betejë qytetërimesh në këtë vend, dhe ne e marrim gabimisht për garë politike?