Arrihet Marrëveshja mes Kosovës e Serbisë; Media kosovare ka ende paqartësi për dy pika të marrëveshjes

Agjencitë kosovare të lajmeve, dhe jo vetëm, njoftojnë ‘scoop’-in e pritshëm se është arritur më në fund marrëveshja e normalizimit të marrëdhënieve mes Kosovës e Serbisë. Dy kryeministrat kanë vënë firmat për të 15 pikat që ka formuluar skuadra e Catherine Ashton-it. Është Koha Ditore që flet për 15 pika, ndonëse nuk sqaron mirë se si është vendosur për pikën 9 e për pikën 14, për të cilat ka pasur kontestime nga pala serbe. Pikat janë si më poshtë:

1: Krijimin e Bashkësisë së Komunave me shumicë serbe në Kosovë, e hapur edhe ndaj komunave të tjera, nëse anëtarët pajtohen.
2: Kjo Bashkësi do të formohet me statut.
3: Strukturat do të formohen sipas të njëjtës bazë, sikurse edhe rajonet ekzistuese në Kosovë.
4: Kompetencat do të jenë sipas Kartës evropiane të vetëqeverisjes lokale dhe sipas ligjeve të Kosovës.
5: Bashkësia e Komunave serbe do të ushtrojë kompetenca shtesë, ashtu siç i jep autoriteti qendror.
6: Bashkësia do të ketë një rol përfaqësues në autoritetin qendror,  dhe do të ketë një vend në Këshillin konsultativ të komuniteteve.
7: Në Kosovë do të ketë vetëm një forcë policore,  e cila do të quhet “Policia e Kosovës”.
8: Saktësohet se “e tërë policia në veri të Kosovës do të jetë e integruar në kornizën e Policisë së Kosovës” dhe se rrogat e policëve do të jenë vetëm nga Policia e Kosovës. Anëtarëve të strukturave të tjera serbe të sigurisë do t’u ofrohen pozita përkatëse në strukturat e Kosovës.
9: Saktësohet se do të ketë një post të komandantit rajonal për komunat me shumicë serbe në veri të Kosovës dhe ai do të jetë serb i Kosovës i zgjedhur nga Ministria e Brendshme e Kosovës nga një listë, që do ta paraqesin katër kryetarët e komunave në emër të Bashkësisë; përbërja e Policisë së Kosovës në veri do të reflektojë strukturën etnike.
10: Sipas marrëveshjes së propozuar  “autoritetet gjyqësore do të integrohen dhe punojnë në kuadër të sistemit ligjor të Kosovës. Gjykata e Apelit nga Prishtina do të themelojë një panel të përbërë nga gjykatësit serbë të Kosovës, të cilët do të merren me të gjitha komunat me shumicë serbe. Një njësi e kësaj Gjykate të Apelit do ta ketë selinë në pjesën veriore të Mitrovicës.
11: Zgjedhjet lokale në vitin 2013 do të zhvillohen me lehtësimin e OSBE-së dhe në përputhje me ligjet e Kosovës.
12: Kjo pikë flet për përpilimin e një plani të implementimit, i cili do të përmbante afate të sakta kohore, e që do të përpilohej deri me 26 prill.  Në implementimin e kësaj marrëveshjeje do të bëhej kujdes edhe për transparencën e fondeve.
13: Sipas pikët 13 palët do të duhej të arrinin  marrëveshje për energji  dhe telekom para mesit të muajit qershor po të këtij viti.
14:  Palët pajtohen se asnjëra nuk  do të bllokojë palën tjetër, apo të inkurajojë të tjetër që të bllokojnë kërkesat për anëtarësim në organizatat dhe forumet ndërkombëtare.
15: Do të themelohet  një komision implementues nga të dyja palët me një lehtësim të Bashkimit Evropian.

Re.Pu.