Pëllumb Xhufi: Manifestimi i PDIU para Parlamentit, parodia më e shëmtuar. Berisha arkitekt i përçarjes veri-jug

Historiani Pëllumb Xhufi flet për realitetin  e ri të çështjes çame dhe partinë e re të z. Dojaka në një intervistë të gjatë për Xhevdet Shehun te numri i sotëm i gazetës Dita.

Xhufi gjykon se PDIU nuk e ka kryer misionin e saj, pjesërisht se s’ka dashur e pjesërisht se s’ka mundur, pasi “në momentin që nuk ka një raport të drejtë mes misionit historik (...) dhe interesave të vogla, të ngushta dhe madje personale, nga ai moment çështja është e kompromentuar” prandaj e konsideron si një fakt pozitiv krijimin e Aleancës Popullore nën drejtimin e Artur Dojakës, si impuls pozitiv në jetën politike të vendit por dhe si parti që ka kauzë çështjen çame.

Xhufi kujton se z.Idrizi premtoi dorëheqje vjet në rast se rezoluta nuk miratohej dhe e quan “mizanskenë të shëmtuar ku u bënë pjesëmarrës edhe përfaqësuesit e PDIU-së, sikur rezoluta për Çamërinë gjoja paska kaluar qysh në vitin 2004, por dikush i paska ngatërruar letrat dhe ai dikush duhet të futet në burg!... Manifestimi i partisë së Idrizit para Parlamentit ka qenë parodia më e shëmtuar që kam parë ndonjëherë...” sepse, thotë Xhufi “po ta kishin seriozisht do të kishin dalë disa herë nga qeveria, nga një qeveri që disa herë ka dalë kundër çështjes shqiptare në përgjithësi e kundër asaj çame në veçanti.”

Sipas Xhufit, “Rezolutat nuk janë dokumente të dhëna një herë e përgjithmonë. OKB-ja, parlamenti i botës, brenda një viti në periudhën 1998-99 ka miratuar 6 Rezoluta për Kosovën”.

Xhufi e mbyll, duke thënë se kjo qeveri nuk e artikuloi anjëherë çështjen kombëtare e nuk ka asnjë platformë mbi të. Berisha, është një arkitekt i një përçarjeje të madhe që ka dashur të ushqejë mes veriut e jugut, dhe kujton 100 vjetorin, kur denigroi figura të jugut si Abdyl Frashëri e Ismail Qemali e ngriti figura të dyshimta me tradhëti të provuar, si Ahmet Zogu.

k.c.