Sondazhi Soros: Kampion i anshëm djathtas, për të përfaqësuar një popullsi që ka anuar majtas

Në njoftimin për mediat të Fondacionit Shoqëria e Hapur për Shqipërinë (njohur si Fondacioni Soros) rreth Sondazhit Social Europian të zhvilluar në Shqipëri, shifra e parë e raportuar është indeksi i orientimit politik (djathtas apo majtas) Konkretisht, në njoftim shkruhet: “Të pyetur për përkatësinë e tyre ideologjike djathtas apo majtas, në një shkallë nga 0 deri në 10, ku 0 nënkupton të majtën ekstreme dhe 10 të djathtën ekstreme, në shkallë kombëtare, shqiptarët janë të qendrës, me tendencë djathtas, në nivelin 5.3”.

Por kjo gjë mund të thuhet për kampionin e sondazhit, e jo për popullsinë shqiptare. Sepse në 12 vjetët e fundit, partitë e djathta të marra së bashku (pavarsisht se në ç’koalicione janë përfshirë) nuk kanë marrë asnjëherë më shumë se 48.6% të votës popullore.

Në fakt, në sondazh ishte pyetur se për cilën parti kishin votuar të anketuarit në 2009-ën, por Fondacioni zgjodhi të japë këtë informacion: “Një pamje e kryqëzuar e gjetjeve paraprake mbi partinë e votuar në vitin 2009, dhe partinë që ndjejnë më afër sot, sugjeron se Partia Socialiste ruan dy te tretat e elektoratit të 2009-ës dhe gjen të alienuar (jo afër me ndonjë parti) 30.6% të atyre që e votuan në 2009-ën. Ndërsa Partia Demokratike ruan 54.5% të zgjedhësve të saj në 2009-ën, dhe gjen të alienuar 36.7% të këtyre zgjedhësve të 2009-ës”.

Në qoftë se Fondacioni do të jepte të dhënat e plota të votimit të kampionit në 2009-ën, mund ta krahasonim kampionin me rezultatet e zgjedhjeve të 2009-ës, për të parë se nga anon kampioni. Sidoqofte, duke gjykuar nga indeksi 5.3 që u raportua në fillim dhe prirja e shqiptareve per te barazuar ideologjine e tyre me etiketat ideologjike qe i vene vetes partite, hamendja ime është se pjesa e kampionit që ka marë pjesë në votime do të ketë votuar në nivelin rreth 53% për partitë e djathta, ndërkohë që KQZ-ja u zyrtarizoi atyre vetëm 48.6% të votës popullore ne 2009-en…

E.Zaloshnja