Një sondazh që ka tërhequr vëmendjen dhe disa pikëpyetje që ngrihen

Rezultatet e një sondazhi të financuar e publikuar nga Fondacioni “Soros” kanë pushtuar faqet e para të gazetave të sotme, ku secila ka nënvizuar atë rezultat që ka pëlqyer më shumë. Disa gazeta kanë nxjerrë në evidencë faktin që gati 50% e shqiptarëve nuk ndihen afër me asnjë parti, e të tjera kanë nxjerrë në evidencë mbështetjet që gëzojnë partitë në elektorat. Sipas sondazhit, “realizimi i të cilit koordinohet nga zyrat qendrore në City University London” (ky ishte përcaktimi i vetëm që bënin të gjitha gazetat mbi organizatorët), PD-ja është 3 pikë përpara PS-së, konkretisht 23 % kundrejt 20%.

Sondazhi ka provokuar kritika të menjëhershme, dhe këto kritika legjitimohen në një vështrim të parë dhe nga disa rezultate, që nuk përputhen – të paktën – me historinë elektorale të shqiptarëve. 50% e shqiptarëve nuk ndihen afër ndonjë partie? PD-ja është përpara PS-së, ndonëse ka tetë vjet në pushtet? LSI-ja, AK-ja, FRD-ja, dhe PDIU-ja marrin nga 1% të votave?

Eduard Zaloshnja, një nga ekspertët e fushës, ka bërë disa vërejtje e ka ngritur disa pikëpyetje lidhur me këtë sondazh. Pse nuk u dha asnjë e dhënë për marzhin e gabimit statistikor? Pse nuk e kanë llogaritur, ndërkohë që llogaritja mund të bëhet shumë thjesht e fare kollaj? Pse kampionimi ish kombëtar, ndërsa rezultatet u dhanë për qarqe të veçanta (në qarkun e Kukësit, që përfshin Tropojën, Hasin e Kukësin, janë intervistuar, sipas Zaloshnjës, vetëm 34 vetë)?

Re.Pu.