Nuk ekziston çmim “Qytetar Nderi i Nju Jorkut”, shkruan Vehbiu dhe shton për mediat: Keni dhënë lajm të rremë (dhe keni harruar Shinasi Ramën)

Ardian Vehbiu është befasuar kur ka lexuar në mediat e sotme lajmin për shpalljen e Kreshnik Spahiut “Qytetar Nderi” i Nju Jorkut (vetë Vehbiu jeton atje). Shkruan publicisti i njohur në blogun e vet:  “U befasova pak kur lexova, në Tema dhe konfirmova në Top-Channel e Panorama, se Kryetari i Aleancës Kuq e Zi, Kreshnik Spahiu, ishte shpallur “qytetar nderi” i New York-ut... Në njoftim, pa cilësuar ndojë burim, thuhet edhe se: Me kërkesë të rajonit të Manhatanit dhe presidentit të këtij rajoni, Scott M. Stringer, Kreshnik Spahiu është shpallur qytetar nderi i Nju Jorkut, duke u bërë kështu i pari dhe i vetmi nënshtetas i huaj që merr këtë titull. U befasova, para së gjithash, sepse nuk kisha dëgjuar kurrë për këtë titull: “qytetar nderi i New York-ut”; dhe pasi u bëra kurioz dhe kërkova në ueb, mësova se një titull i tillë nuk ekziston – çka edhe shpjegon pse asnjë nënshtetas i huaj nuk e ka marrë. Ekziston, përkundrazi, titulli i “qytetarit të nderit të ShBA”, të cilin e akordon Kongresi i ShBA dhe që e kanë marrë, deri më sot, gjithsej shtatë personalitete. Përndryshe, një mysafiri të shquar mund t’i jepen “Çelësat e New York-ut”, nga kryetari i bashkisë së qytetit (në momentin e tanishëm, Bloomberg)...”

Më pas Vehbiu ka bërë një kërkim dhe jep disa sqarime mbi çmimin në fjalë: “Në faqen zyrtare të Forumit Shqiptaro-Amerikan për Demokraci (FSHAD), lexoj, përkundrazi, se është fjala për një “çmim nderi” që u është dhënë Kreshnik Spahiut dhe Shinasi Ramës, gjatë një takimi të organizuar nga ky forum, midis komunitetit shqiptaro-amerikan dhe Kryetarit të AKZ-së, Kreshnik Spahiu, në ambientet e restorantit Lura në Manhattan. Në brendësi të njoftimit, thuhet, se Kreshnik Spahiu dhe Shinasi Rama kanë marrë “çertifikata nderi”, nga presidenti i Manhattan Borrough Scott Stringer dhe presidenti i Bronx Borough Ruben Diaz Junior... Lajmi në anglishte nuk gjendet gjëkundi, as ka ndonjë njoftim në faqen zyrtare të Manhattan Borough; në një kohë që gazetat dhe mediat e tjera shqip kanë shpërfillur faktin që nderi i është bërë jo vetëm Spahiut, por edhe Shinasi Ramës; madje Shinasi Rama e meriton shumë më tepër se mysafiri Spahiu, që të nderohet për 5-vjetorin e Pavarësisë së Kosovës; për çfarë përfaqëson sot dhe për kontributin politik të drejtpërdrejtë që ka dhënë në këtë fushë. Mos harroni të vëreni, me këtë rast, si krejt lajmi i dhënë nga mediat është i rremë...” Re.Pu.

Vehbiu i plotë:

http://xhaxhai.wordpress.com/2013/02/19/lost-in-translation/...