Majko fut veten te "kuajt e cirkut" (që sipas tij "s'munden të flasin") dhe thotë se Shqipëria pret "kuajt e garës"(ata që flasin pa u thënë: Fol)

Pandeli Majko citon një libër të shkrimtarit polak Cesllav Millosh në një editorial të vetin botuar në TemA Online dhe gjen aty "një përshkrim interesant dhe cinik të shoqërisë njerëzore". "Përshkrimi ishte një paralele e njerëzve me kuajt… Ata ndahen për punë, cirk dhe gara… Masa më e madhe e shoqërisë është për punë. Një pjesë që përfshin politikën, sportin dhe botën e televizionit i përket “cirkut”. Kuajt e garës janë ata që ndërtojnë kulturën e shoqërisë - shkruan Majko dhe më pas ngre pyetjen: Kush janë “kuajt e garave” të shqiptarëve?

Pjesë nga shkrimi: "...Kjo është një pyetje sa e lehtë për tu bërë aq edhe e vështirë për tu përgjigjur. Mesatarja shoqërore e llogaritur për njerëzit e kategorisë së tillë është rreth 1 për qind… Shoqëria shqiptare është mbërthyer nga niveli i inteligjencës së “cirkut”, të cilës nuk i intereson e vërteta, por veç pëlqen ta shpallë atë. Kjo predominancë e “cirkut” po ndërton identitet të lidhur me urrejtjen... Mendoj se asnjëherë më shumë se më parë shoqërisë shqiptare i nevojiten “kuajt e garave” të kulturës së saj… Shoqëria civile shqiptare ose e ashtuquajtura e tillë është në masë të madhe një koperturë biznesi. Ata që heshtin sot, janë intelektualët.. Asnjëherë si më parë Shqipëria nuk ka nevojë për zërin e tyre".
Majko ngre më pas një pyetje: "A mund ta bëjë politika zërin e munguar të mendjes në Shqipëri?" - dhe përgjigjet:
"Dhimbshëm them se ky është mision i pamundur i politikanit si profesion dhe përpjekjes së tyre shpesh të dëshpëruar për të qëndruar në pararojë... Endrra e politikës për ta lidhur qëllimin e saj me udhëheqjen shpirtërore ka prodhuar mallkimin e vetvetes, ka prodhuar luftërat fetare dhe ideologjitë e diktaturave. Kuajt e “cirkut” nuk munden të flasin sot. Nga brenda çadrës së politikës pritet që të vinë ata… Kuajt e garës!Kush janë “kuajt e garës”? Përgjigja ime është e thjeshtë. Nga se e dallon një kalë gare nga të tjerët? Ato janë përbuzja ndaj stanjacionit, individualizmi dhe sensi i të bërit të gjërave pa i thënë dikush: Fol!" (a.th.)

Majko i plotë:
http://www.gazetatema.net/web/2013/01/08/kuajt-e-garave-qe-i...