Kishat ortodokse mbështesin marrëveshjen e Egjiptit për manastirin e lashtë në Sinai

Egjipti dhe drejtuesit e Manastirit të Shën Katerinës kanë arritur mirëkuptim për zgjidhjen e mosmarrëveshjes mbi statusin ligjor dhe pronat e këtij kompleksi të lashtë fetar. Marrëveshja, e cila ende pret nënshkrimin zyrtar, synon të mbrojë karakterin fetar të manastirit dhe të garantojë vazhdimësinë e jetës monastike.

Sipas zyrtarëve grekë, marrëveshja parashikon edhe leje qëndrimi afatgjata për murgjit, duke adresuar një nga shqetësimet kryesore për të ardhmen e komunitetit. Ministria e Jashtme egjiptiane deklaroi se kontrata do të zbatojë vendimin e Gjykatës së Apelit të Ismailias, të majit 2025, në përputhje me legjislacionin vendas.

Marrëveshja është mbështetur nga pesë institucione ortodokse, përfshirë Patriarkanën Ekumenike të Konstandinopojës dhe Kishat e Greqisë e Qipros. Kryeministri grek Kyriakos Mitsotakis e cilësoi atë një “kthesë historike”, ndërsa ministri i Jashtëm grek falënderoi presidentin egjiptian Abdel-Fattah El-Sisi për ndërhyrjen e tij në zgjidhjen e çështjes.

I themeluar në shekullin e gjashtë, në rrëzë të malit Sinai, Manastiri i Shën Katerinës është një nga komunitetet më të vjetra monastike të krishterimit, me një histori afro 1.500-vjeçare. Ai njihet për dorëshkrimet dhe ikonat e rralla, ndërsa zona përreth është pjesë e Trashëgimisë Botërore të UNESCO-s.

Mosmarrëveshja u përshkallëzua pas vendimit gjyqësor të majit 2025, i cili trajtoi pronësinë shtetërore dhe të drejtat e murgjve për përdorimin e hapësirave fetare, arkeologjike dhe tokave përreth. Vendimi shkaktoi shqetësim te drejtuesit ortodoksë, të cilët kërkuan garanci për mbrojtjen e të drejtave historike të manastirit.

Megjithatë, marrëveshja ka hasur edhe kundërshtime. Ish-kryepeshkopi i Sinait, Damianos, kritikoi mungesën e transparencës për kushtet e saj dhe vuri në pikëpyetje autoritetin për nënshkrimin. Kushtet e plota të kontratës nuk janë bërë ende publike, ndërsa data e nënshkrimit do të caktohet në bashkëpunim me autoritetet egjiptiane.