Baze e quan Fevziun “Berisha qeros” dhe flet për një listë “jo përballë Berishës” që qarkullon në TV

Mero Baze ka komentuar intervistën e mbrëmshme të Edi Ramës përballë gazetarit të Klan Blendi Fevziu dhe ndër të tjera shkruan: “Debati ishte i tillë që detyroi gazetarin të shpaloste vetveten, ashtu siç është, i cekët, i përciptë, i pavëmendshëm, i paqartë, shtiracak, gënjeshtar, dhe servil. Dy herë të vetme që Fevziu është përballur me opozitarët e Sali Berishës, Ina Ramën dhe Edi Ramën, me pyetje të ofruara nga Berisha, të dyja herët ka provuar se jo vetëm që nuk kupton çfarë pyet, por nuk kupton as çfarë përgjigjet bashkëbiseduesi. Nuk ishte vetëm detaji i tre ligjeve, që Berisha akoma nuk ka mundur t’ia fusë në kokë Fevziut, e jo më 3 milion shqiptarëve që do t’i çojë në referendum, por gjithë ajo çfarë ai pyeste, ishte si një detyrë shtëpie e bezdisshme që ai kishte detyrë vetëm ta lexonte me zë të lartë. E gjithë kjo i dha debatit një shije formale si debat mes Ramës dhe Berishës qeros, por me rrethana lehtësuese për Ramën, pasi “Berisha” që kishte përballë, fliste çfarë donte Berisha i vërtetë, dhe jo çfarë dinte Berisha i vërtetë…”

Baze shkruan më pas se Berisha ka një listë thuajse publike të gazetarëve të njohur, me të cilët nuk pranon të përballet: “Këto lista janë të shpërndara në çdo televizion në formën e porosive, jo vetëm për Sali Berishën, por dhe për krerë të PD-së. Fjala vjen, askush prej zyrtarëve të lartë të PD-së nuk pranon të shkojë tek Ilva Tare, nuk pranon të ketë përballë Mustafa Nanon, Andrea Stefanin, dhe as që bëhet fjalë të jenë qoftë dhe në një restorant si ai i Agron Kuliçit në Dajt bashkë me mua rastësisht. Ka pasur prej tyre që kanë lënë dhe drekën dhe janë çuar kur i kam gjetur në restorant…” A.N