"Shpërthen” Meidani: Qeveria ka shumë llafe e propagandë, demagogji e populizëm

Ish-Presidenti i Republikës Rexhep Meidani deklarohet kritik ndaj punës së qeverisë së re, duke i cilësuar si propagandë,demagogji dhe populizëm arritjet e deklaruara nga ekzekutivi. Në një intervistë për “Koha Jonë”, Meidani thotë se qeveria nuk mund të vazhdojë më në këtë mënyrë dhe propozon të ndërmerren ndryshime që mund të cilësohen si “radikale”. ”Ka diçka që nuk shkon! Një shikim i pakuptimtë dhe i stërzgjatur prapa, një sjellje prej opozite në pozitë! Diçka të ngjashme e kemi vënë re 8 vjet të shkuara, në vitin 2005, gjatë gjashtë muajve të parë të qeverisjes së PD-së. Duket si një sëmundje politike shqiptare e pozitës, pas shumë vjetësh në opozitë! Përveç këtij komenti “miqësor”, po ashtu, mund të them se në këto 6 muaj qeverisje, pavarësisht ç’trumbetohet, ka një humbje të qartë besimi, një zhgënjim të madh të qytetarëve përballë një pritshmërie të lartë të muajve të parë ndaj këtij kabineti. Ka shumë llafe e propagandë, demagogji e populizëm dhe pak ose aspak iniciativa konkrete, ka mungesa të dukshme në mishërim e demonstrim aftësish qeverisëse apo kapacitetesh administrimi, shumë pak lëvizje pozitive dhe ndryshime të mirëpritura. Gati-gati të krijohet, pa dashje, përshtypja e një qeverisje “OJQ-iste”, sepse për rilindje, në kuptimin e ringjalljes, as që mund të bëhet fjalë! Një situatë e tillë, në gjykimin tim, nuk mund të vazhdohet; ajo duhet të ndryshohet sa më shpejt, qoftë dhe me “sakrificën” e ndryshimit pjesor të këtij kabineti...”thotë Meidani.

Për më tepër: http://www.kohajone.com/politika/item/5165-ish-presidenti-meidani-te-ike-kryeministri-rama.html

k.k