Fenomeni “Grillo” dhe 8 milion vota të shkuara dëm!

Zgjedhjet e fundit në Itali dëshmuan lindjen e një fenomeni të ri elektoral, që mban emrin e komedianit të njohur Beppe Grillo. Ai u rrit elektoralisht falë antipopulizmit që shfaqi, çka tërhoqi pranë lëvizjes së tij “5 Yje”, figura shumë popullore në Itali. Komediani i njohur mori më shumë se 20 për qind të votave në zgjedhjet e fundit ku ligjërimet publike të tij mbusheshin me kritika ndaj klasës politike dhe godisnin fenomenet negative. Në fushatë, ai nuk u shqua për një alternativë konkrete se si gjërat mund të bëheshin më mirë, fakt që u përmend edhe në periudhën paszgjedhore kur atij iu kërkua të përfshihej në qeverisjen e vendit. Por tashmë “yjet” e Grillos duket se janë duke “perënduar”. Media italiane analizon se tashmë fenomeni Grillo është më shumë një fakt historik sesa një realitet.

“Nëse vazhdon rrugën në të cilën ndodhet aktualisht, shumë shpejt Beppe Grillo  dhe Lëvizja “5 Yje” mund të mbeten vetëm si lëndë për studime, si një model i vetëasgjësimit në politikë. Nuk ishte parë asnjëherë një parti që arrin të fitojë 8 milion vota, sikurse ka bërë komediani Grillo, pra 25 për qind të votave. Por më pas ai iu dorëzua parëndësisë politike dhe groteskut. Të paktën 2 herë në javë, lëvizja “5 yje” vetëdenigrohet. Një parlamentar beson në egzistencën e sirenave ndërsa një tjetër ka frikë nga “mikrocipi” i instaluar poshtë lëkurës etj “ analizon “L’Inkiesta” që përmend faktin se nga kjo forcë janë larguar një serë figurash të rëndësishme.

Tashmë Grillo është në fushatë elektorale, udhëton nëpër Itali me një tour propagande, por me pagesë, me sloganin “Ta jap unë Europën”. “Dhe zgjedhjet për Parlamentin Europian janë për italianët një nga ato rastet e çuditshme që japin sinjale, sikurse ka ndodhur me Emma Boninon që në 1999 mori 8,5 përqind të votave. Pavarësisht zgjedhjeve pasuese Partia Radikale thuajse nuk egziston fare…” vijon analiza në të cilën lexohet një qëndrim i ashpër ndaj komedianit Grillo dhe lëvizjes që ai përfaqëson.

Analiza e plotë: http://www.linkiesta.it/grillo-m5s-voti

k.k