Të Kripura

Ministri i Jashtëm Igli Hasani raportohet se është në një krizë të thellë besimi. Ka folur aq pak dhe aq formalisht dhe sërish e kanë marrë për keq. Pas samitit ballkanik, Hasani shpërndau një deklaratë të ekuilibruar për Kosovën. E krahasuan me një ministër të Bjellorusisë. 

Në këtë dilemë e ka gjetur ministrin vizita në Estoni ku siç bëjnë me dije burime për “Të Kripura” ai është parë të ecë vetëm nëpër sallat e takimeve. 

Sot është raportuar se ambasadori serb në Tiranë, Slobodan Vukçeviç, është thirrur nga Ministria e Igli Hasanit për të dhënë sqarime për deklarimet e zv.kryeministrit serb, Aleksander Vulin rreth mesazheve të kryeministrit Edi Rama në Athinë.

Sipas njoftimit Ministria e Jashtme i ka cilësuar deklaratat e Vulin si:

Provokuese…dhe në kundërshtim me frymën e marrëdhënieve të bashkëpunimit dhe nuk i shërben paqes dhe stabilitetit në vendet e Ballkanit

Më tej:

Raporti i fundit i Reporterëve pa Kufinj dhe reagimi i kryeministrit Edi Rama se do të marrë masa, përfaqëson një sinjal se padishahu i Tiranës do ta korrigjojë imazhin e vet edhe në këtë drejtim. Për këtë arsye, parashikohet një ndryshim sjelljeje në raport me gazetarët, ndërkohë sipas burimeve të “Të Kripura”, qejahaji i lajmeve të kryeministrisë, Endri Fuga është urdhëruar të bëjë një lëvizje tjetër propagandistike.

Ajo çfarë ka ndodhur me skandalin “5D” në Bashkinë e Tiranës ka gjeneruar zhvillime të papritura. Burime për “Të Kripura” bëjnë me dije se me iniciativë të ish-Borëbardhës  së Durrësit, Vangjush Dako, është ndërmarrë një class action kundër SPAK dhe GjKKO.

Sipas burimeve të gjithë ish-kryebashkiakët që sot ndodhen në burg, në kërkim apo arrest shtëpie kanë firmosur një padi kolektive për standarde të dyfishta në kërkimin e masave të sigurisë, në afatet e hetimeve penale dhe dënimet e kërkuara bazuar dosjet përkatëse. 

Teatri politik i disa muajve duket se po shkon drejt fundit. Dritarja e Shpresës, zhurma në Parlament e kështu me radhë, ngjajnë se po zëvendësohen nga ndërzimi i zakonshëm mes dy partive kryesore, deri më tani non grata për njëra-tjetrën. Raportohet se është rënë dakord për dy komisione hetimore; një për të dhënat e sistemit TIMS dhe tjetri për koncesionet në shëndetësi. Qesharake kur mendon se çështjet po hetohen penalisht.

Në një faqe në Facebook postohej dje kjo këngë. Titulli kuptimplotë, kumbues madje: Pekini maskën e çorri! Me arsyetimin e qashtër: Se nuk i mbante më petë lakrori! 

Vazhdon teksti me denoncimin e pazareve të Kinës me Amerikën, që si gjeopolitikë globale kondensoi me deviacionizmin e vet anti-parimor këtë xhevahir të polifonisë sonë. Sepse jona është, nuk kemi çfarë themi!

Pas propozimit të deputetit socialist Erjon Braçe që periudha e ciklit menstrual për femrat të njihet si sëmundje e paguar, ministret gra të qeverisë kanë dalë me propozim ligjor që në zyrat shtetërore të drejtuara nga gratë të mbahet portreti i z. Braçe. Kjo në shenjë respekti për vëmendjen e treguar ndaj një problemi kaq akut për femrën shqiptare. 

Marrëveshja për emigrantët e bëri kryeministrin Rama personazhin e emisionit “Fratelli di Crozza” këtë javë në Itali. Me Ramën që u përgjigjet pyetjeve të gazetarit ndërsa kërkon herë pas here miratimin e kryeministres Meloni, materiali satirik e vë theksin te ajo që i bashkon shqiptarët dhe italianët veç racës: una mazza (një shuk parash), thënë ndryshe e njëjta prirje për të korruptuar dhe për t’u korruptuar.

Në Itali, Shqipëria ka hyrë me suksesin turistik publicitar në satirën politike. Tani që edhe fatura e restorantit në Berat u shlye, duart janë të lira për të bërë atë që italianët dinë ta bejnë me Shqipërinë: të tallen.