Lajme

Dhomat e biznesit i kërkojnë qeverisë që në paketën fiskale të shfuqizohet pika e ligjit për strehimin social, i cili i detyron ndërtuesit që për sipërfaqet ndërtimore të banimit mbi 2000 m2 të kalojnë 3 për qind tyre në favor të bashkive, që të përdoret për të pastrehët. Ministri Arben Ahmetaj, tha se një masë e tillë aplikohet në shume vende.

Emigranti nga Mali, Mamoudou Gassama, 22 vjeç ka reaguar menjëherë duke shpëtuar jetën e një fëmije 4 vjeçar në Paris. I pyetur nga gazetarët ai ka deklaruar se kishte vepruar pa u menduar dhe se pas shpëtimit kishte ndjerë shumë frikë.

Ambasadori i Polonisë në Tiranë Karol Bachura publikon sot një opinion në “Gazeta Shqiptare”të cilit i është vënë titulli: Pse ne polakët e duam Shqipërinë në BE. 

Në opinion renditen disa aspekte parimore të procesit të zgjerimit të unionit, të cilin Polonia e mbështet fuqimisht. Është një qëndrim që i jep shprsë vendeve si Shqipëria, të gjendura përballë një skepticizmi nga vende si Franca, që rrjedhin nga arsye të përgjithshme, por edhe nga problemet specifike të vendit tonë si krimi dhe korrupsioni. 

Prej disa javësh mediat e ndryshme, përfshirë ato më serioze janë duke pyetur për fatin e princit saudit të kurorës, Mohammed bin Salman, një njeri ambicion që synon të ndryshojë politikën e vendit të tij duke u afruar me Izraelin dhe SHBA dhe duke mbajtur në fokus si kundërshtar, Iranin. Salman nuk është parë në media dhe në aktivitete zyrtare prej disa javësh, ndërkohë që së fundmi, media iraniane, PRESS TV pretendon se bin Salman është qëlluar me armë.

Italia zhytet në kaos politik pas refuzimit nga presidenti Matarela për të dekretuar emrin e propozuar për ministër Financash. Pas këtyre zhvillimeve presidenti thirri në pallatin presidencial, Carlo Kotarelin, një ish-zyrtar i rangut të lartë të FMN.

Kjo lëvizje shihet si një manovër për t'ia besuar atij formimin e një qeverie  teknokratësh, në një kohë kur situata politike në Itali është veçanërisht e brishtë.

Hendeku që kanë zyrat e Punës për të plotësuar objektivat e punësimit, e kanë shtyrë qeverinë të përfshijë në vendet e lira të punës kuotat e rekrutimeve për ushtarët me pagesë. 

Madje Forcat e Armatosura kanë patur stendën e tyre në Panairin e Punës në Berat, organizuar nga Shërbimi Kombëtar i Punësimit. Stendat i ka vizituar, mes të tjerëve edhe kryeministri Edi Rama, ndërsa 1/3 e vendeve vakante i përket ushtarëve me pagesë. Në Panair u rklamuan 300 vende të lira pune, ndërsa Rama u shpreh se objektivi i vitit  për punësime nga zyra e punës është për 25000 mijë kontrata. 

Si do do të gjykojnë 490,000 anëtarët e Podemos vendimin e liderit të saj, Pablo Iglesias dhe bashkëshortes së tij, Iren Montero për t'u zhytur me kredi "deri në fyt" për të blerë një shtëpi 270 metra katror me kopsht dhe pishinë në një fshat 40 km larg nga Madridi? 

Rezultatet e referendumit origjinal do të shpallen të hënën, edhe pse nuk ka dyshime se baza e partisë spanjolle do të konfirmojë qëndrimin e çiftit në pozita udhëheqëse në krye të lëvizjes majtiste. 

Nga 1 qershori hyjnë në fuqi tarifat e reja gjyqësore, të cilat reflektojnë një rritje prej 40 përqindësh për hapjen e padive nga qytetarët. Në një intervistë për Tema TV, kreu Shoqatës së Avokatëve Penalistë, Sajmir Vishaj thotë se pagesat  e larta procedurale do të “frenojnë” qytetarët, për t’iu drejtuar dyerve të gjykatave.

850 ushtarë nga 11 vende, 19 anije dhe një ekip i zhytësish janë përfshirë në një operacion për pastrimin e detit të Estonisë nga municionet e Luftës së Dytë Botërore që kërcënojnë ekosistemin.

Për më shumë se 70 vjet,  miliona ton municione të luftës qëndrojnë të ndryshkura nën ujë. Vetëm në Detin e Veriut dhe Detin Baltik vlerësohet se ka mbi 1.6 milion ton municione të fundosura nën ujë. Me urdhër të aleatëve, ngarkesa të tëra municionesh u hodhën në det pas luftës.

Kolumbia pritet të jetë anëtari më i ri i NATO-s në formën e një partneri global. Lajmi është bërë i ditur nga presidenti Juan Manuel Santos pak përpara zgjedhjeve parlamentare. Kolumbia nënshkroi një marrëveshje partneriteti me Aleancën në vitin 2017, pas arritjes së paqes me rebelët e FARK. 

Kolumbia përfiton shumë nga të qenit pjesë aktive e komunitetit ndërkombëtar, shumë nga problemet me të cilat përballemi janë përherë e më shumë globale dhe ne kemi nevojë për mbështetjen dhe bashkëpunimin me vende të tjera për zgjidhjen e tyre