Lajme

Gazeta e njohur britanike “The Guardian” i është shtuar sot listës së pafundme të mediave që shkruajnë për të ashtuquajturën Mafia Shqiptare. Përmes një shkrimi ku nuk ka ndonjë të dhënë statistikore, ku përzihet emfatizimi i shqiptarëve të dhunshëm, ku dominon titulli bombastik “Mbretërit e kokainës”, ku venerohet pa dashje aftësia e shqiptarëve në trafik dhe në shpërndarje e ku patjetër që nuk mungojnë edhe klishetë e zakonshme të Besës dhe Kanunit, gazeta në fjalë përsërit litaninë e bezdishme të gënjeshtrës që quhet Mafia Shqiptare.

Është arrestuar në Santa Cruz de la Sierra të Bolivisë, Cesare Battisti, i shpallur në kërkim nga Italia që në vitin 1981. Ai ndodhej në Bolivi pasi ishte larguar nga Brazili në vitin 2018, për shkak se presidenti Michel Termer i revokoi statusin e rezidentit të përhershëm.

Qeveria greke ka hyrë në krizë sot, teksa partneri i djathtë i kryemininstrit grek Tsipras, Panos Kamenos, ka deklaruar tërheqjen nga qeveria. 

Deklarata erdhi pas një takimi me kryeministrin të cilin Kamenos e ka cilësuar si shumë të rëndësishëm. Ai ka vlerësuar bashkëqeverisjen me Syriza-n duke u ndalur gjithësesi te çështja e emrit të Maqedonisë, që sipas tij është e pakapërcyeshme. 

Kamenos do të sqarojë më gjerësisht mediat për vendimin e tij, por largimi duket se çon drejt zgjedhjeve të parakohshme në Greqi.

Nxitimi i Gent Cakajt për ta shpallur veten ministër të Jashtëm në profilet e veta në rrjetet sociale, nuk është një akt i izoluar. Burimet bëjnë të ditur se Cakaj ka kërkuar takim me drejtorë të ndryshëm në Ministrinë e Jashtmë që në datën 31 dhjetor, pra tri ditë pas Asamblesë së Partisë Socialiste ku ai u shpall ministër nga kryeministri Edi Rama.

Partia Demokratike ka kërkuar sot nga Inspektoriati i Lartë i Deklarimit dhe Kontrollit të Pasurive që të nisë hetimin për kryeministrin Edi Rama. Sipas përfaqësueses Dhurata Çupi, hetimi duhet të merret me  diferencën prej 300 milionë lekësh mes deklarimit të z. Rama dhe vlerës së shtëpisë së tij në Surrel ku banon.

Presidenti i vendit, Ilir Meta, ka shpërndarë sot paradite një tjetër status në rrjetin social Facebook, lidhur me situatën e krijuar me emrin e ri për Ministrinë e Jashtme. Sipas Metës, propozimi i Kryeministrit është joserioz dhe e vendos politikën e jashtme të vendit në kushte eksperimentale. 

Parlamenti maqedonas ka miratuar sot amendamentin kushtetues për riemërtimin e vendit me emrin Republika e Maqedonisë Veriore. Emri është në përputhje me marrëveshjen me Greqinë duke i dhënë fund tensioneve 27 vjeçare. 

Revista e njohur “Nature” raporton për një vëzhgim të ri që ka të bëjë me fushën magnetike të Tokës. Sipas revistës në fjalë, ndryshimi që po ndodh është shumë i shpejtë dhe po çon në rrëshqitjen e Polit të Veriut nga Kanadaja drejt Siberisë, kjo për shkak të lëvizjeve “kaotike” të hekurit të lëngshëm nën sipërfaqen e tokës.

Problemet me median nuk mungojnë as në Italinë fqinje, ku përherë duket se ke të drejtë të thuash çdo gjë. Zv.kryeministri italian, Luigi Di Maio paralajmëronte sot në rrjetin social tuiter, se do të heqë financimin publik për mediat në krye të tre vjetëve. Si argument mbështetës për këtë masë është sjellë një titull i gazetës së djathtë Libero” e cila sot hapej me titullin: Comandano i terroni.

Policia është zhvendosur prej dy ditësh në fakultete për të “normalizuar” situatën e krijuar nga bllokimi i auditoreve. Madje efektivë të saj nuk kanë nguruar të përplasen me studentët.  Me ligj forcat e rendit e kanë të ndaluar hyrjen në Universitete dhe çdo lëvizje mund të bëhet vetëm me kërkesë të vetë Universiteteve.

Një kërkesë e tillë është bërë dhe mban firmën e Administratorit të Universitetit të Tiranës, Skerdi Dafa.