Lajme

Kapiteni i Tiranës, Gentian Muça, pas ndeshjes së fundit me Partizanin. Thirrje njësoj si ato për të cilat ankohen të gjithë: Mbyte, mbyte shqiptarin! Një ekip që rigjeneron me thirrje një sentiment lokalist nuk ka asgjë të keqe, por pse vallë një kapiten u bën thirrje tifozëve që të mbysin "morrin e kuq të Beogradit", kur shumë mirë mund të vriten në fushë dhe ta mbyllin këtë punë. E megjithatë, kjo mund të mirëkuptohet përballë groteskut të himneve të kombëtares.

Shqipërisë nuk i kanë munguar dashamirësit, sidomos ata me pagë ambasadori që në vendin tonë fitojnë rëndësi më shumë nga sa realisht duhet të kenë. Hoffman është ambasadori më i njohur gjerman që ka kaluar nga Shqipëria dhe kjo ndoshta edhe për meritë të tij dhe mediave. Ai nuk do jetë i pranishëm në mbledhjet e grupeve parlamentare të PS, PD dhe LSI me ambasadorët Donald Lu e Romana Vllahutin, e megjithatë tregoi se është në dijeni të planeve të Europës për Shqipërinë. Rast i rallë për një ambasador të konfidojë një “sekret” të tillë, por Hoffman e bëri.

Bankat e nivelit të dytë shpesh shkelin ligjin duke aplikuar komisione bankare të fshehta për shërbimet që iu ofrojnë klientëve. Ekspertët e bankingut, Edvin Libohova dhe Arjan Kadare në emisionin "Portofol" në "TemA TV" japin sugjerime për qytetarët që të jenë të kujdeshëm kur firmosin kontrata me bankat dhe t’i lexojnë ato me kujdes. Bankat e nivelit të dytë e kanë me ligj të jenë transparente me klientët, por shpesh kjo e drejtë shkelet.

Përfaqësuesit të Dhomës Amerikane të Tregtisë shprehën shqetesimin për pagesën disa herë nga bizneset të taksës  së arsimit per çdo nipt sekondar dhe për pagesën e taksave nga bizneset që nuk janë aktive. Kreu i Komitetit të Taksave dhe Ligjeve në Dhomën Amerikane të Tregëtisë tha se  “i njëjti subjekt pavarësisht sa njësi ka duhet të paguajë po aq herë për të njejtën tarifë të taksës për arsimin”. Sipas tij, subjektet me status pasiv, janë të detyruara të paguajne taksat, pavarësisht se janë në faliment. Argumenti i Bashkisë ishte se për investimet publike nevojiten para.

Papa Françesku është nderuar me çmimin “Karli i Madh” duke u renditur si personi i katërt joeuropian që e merr atë. Çmimi u themelua në vitin 1949 nga Kurt Pfeiffer për të nderuar ata që japin më shumë kontribut në “mirëkuptimin europiano-perëndimor”, meqenëse Europa vinte nga një luftë shkatërrimtare.

Autoriteti i Konkurrencës i ka rekomanduar Enti Rregullator të Energjisë të heqë nga draftmetodologjia afatin 15 vjeçar të kontratave si edhe çmimet fikse të shitjes së energjisë së rinovueshme. Nuk është e qartë sa do të merret në konsideratë kjo dhe si mund të ndikojë në çmimin fundor. "TemaTV"

Gjatë 20 muajve të qëndimit të Ahmet Davutoglusë në postin e kryeministrit turk dhe drejtuesit të partisë për "Drejtësi dhe Zhvillim", AKP ka pasur shpesh zëra për një krisje në marrëdhënien mes kryeministrit dhe presidentit turk, Rexhep Taip Erdogan. Por presidenti i hidhte poshtë ato në mënyrë të përsëritur.

Presidenti i Republikës, Bujar Nishani, ka kthyer sot për rishqyrtim ligjin “Për marrëveshjet ndërkombëtare në Republikën e Shqipërisë”. Si arsye për këtë vendim, Presidenti jep vlerësimin e tij se neni 19/2 bie ndesh me Kushtetutën.

Robert Elsie sjell në faqen e tij “albanianhistory.net” një koleksion fotosh të realizuara mes viteve 1904-1913 në Shqipëri dhe në Mal të Zi, nga Edith Durham. Udhëtarja britanike është e njohur për shkrimet e veta për Ballkanin dhe shqiptarët, por ajo ka realizuar edhe një seri fotosh që administrohen nga Instituti Mbretëror Antropologjik, Muzeu Britanik i Londrës dhe Muzeu “Pitt Rivers” në Oksford. Duram i realizoi fotot me një aparat “Kodak Brownie” dhe ato paraqesin interes më tepër për të apasionuarit e fotografisë.

Këshilli Drejtues i Radio Televizionit Shqiptar zgjodhi Thoma Gëllçin si drejtor të përgjithshëm të RTSH-së. Gëllçi u zgjodh me 7 vota nga 11 anëtarë të Këshillit Drejtues të RTSH-së. Ai kandidonte në këtë post përballë Petrit Malajt. Thoma Gëllçi ka shërbyer si këshilltar i kryeministrit Fatos Nano dhe Drejtori i Departamentit të Informacionit, pranë Keshillit socialist të Ministrave. Ai ka drejtuar në të shkuarën edhe gazetën partiake "Zëri i Popullit".