Ekonomi

Zv./kryeministri i Kinës Zhang Gaoli do të vizitojë Shqipërinë, në kuadrin e një turneu në Europën Lindore. Zëdhënësja e Ministrisë së Punëve të Jashtme kineze, Hua Chunying, noftoi se me ftesën e qeverisë së Rusisë, Estonisë, Sllovenisë, Shqipërisë dhe  Kazakistanit, zv./kryeministri Zhang Gaoli do t'i vizitojë këto pesë vende nga data 11 deri më 19 prill.

Ishulli i Sazanit, ishulli i vetëm i banuar i Shqipërisë, do të jetë i hapur gjatë verës edhe për turistët vendas dhe të huaj. Ministria e Mbrojtjes dhe Ministria e Zhvillimit Ekonomik, Turizmit dhe Sipërmarrjes nënshkruan të mërkurën një marrëveshje bashkëpunimi për lejimin e turistëve për vizita turistike në këtë ishull dikur një pikë e rëndësishme e strategjike e mbrojtjes së Shqipërisë.

Në 6 vitet e fundit të gjitha vendet e Ballkanit Perëndimor bashkë, kanë krijuar 300 mijë vende të reja pune. Në një raport të Bankës Botërore rezulton se Shqipëria ka rritur me 3% punësimin, ku nga 50% që ishtë kjo shkallë në 2013- ën, në fund të 2015-ës shkoi në 53%. 
Megjithatë, Banka thotë se një pjesë e mirë e numrit të të punësuarve kanë ardhur si rezultat i futjes në skemën e sigurimeve shoqërore, edhe pse nënvizon se Shqipëria dhe Kosova vazhdojnë të kenë një shkallë të lartë informaliteti në këtë drejtim. 

Kriza greke ka sjellë një pjesë të mirë të parave të emigrantëve në Shqipëri. Muaji shkurt shënoi një tjetër rekord historik për nivelin e kursimeve në monedhën euro. Vetëm në harkun kohor të një viti, llogaritë në këtë valutë u rritën me 300 milion euro, raporton Tv Klan. Ekspertët e sistemit bankar, sqarojnë se kjo dukuri lidhet ngushtë me situatën që po ndodh në shtetin fqinj. Në 2016-ën remitancat shënuan rritjen më të lartë në 4 vitet e fundit, duke sjellë 650 milion euro të ardhura nga emigrantët në Shqipëri.

Ish-drejtori i CEZ Josef Hajcek dhe vartësi i tij, Jan Ivan janë dërguar në gjyq nga Prokuroria e Tiranës për mashtrim me pasoja të rënda në çështjen ku është i përfshirë edhe Kastriot Ismailaj. Prokuroria thotë se dy shtetasit çekë, të cilëve iu është njoftuar akuza përmes letërporosisë  kanë përdorur të dhëna fiktive dhe kanë vjedhur nga CEZ shumën prej 649 milionë lekësh. Kjo vlerë i është paguar shoqërisë DIA, dega Shqipëri, për shërbime që nuk janë kryer.

Vetëm gjatë vitit 2016 u shtuan 330 milionë euro borxh tatimor të kompanive, bizneseve apo individëve ndaj shtetit, që përbëjnë rreth 31% të stokut total. Vërehet qartësisht se borxhi tatimor është rritur me shpejtësi vitet e fundit, si pasojë e kushteve të vështira në të cilat ka kaluar ekonomia. 

Komisioni i Ekonomisë miratoi projekligjin për faljen e borxheve të biznesit. Projektligji u prezantua në Komision nga Ministri i Financave, Arben Ahmetaj, i cili tha se ky projekligj do të lehtësojë biznesin. Nga ky ligj biznesit i falen afro 91 miliardë lekë, detyrime të prapambetura.

"TemaTv"

Qeveria po mbyll mandatin e parë 4-vjeçar dhe në bilancin e vet duket se do ketë një defiçit të madh që ka të bëjë me investimet publike dhe kryesisht ato në infrastrukturë, ku qeveria e kaluar bazoi strategjinë e saj të zhvillimit. Tre korridore që u lanë pa përfunduar nga mandati paraardhës janë pothuajse në gjendjen e 4 viteve më parë.

Banka që operojnë në Shqipëri kanë dhënë 720 milionë euro kredi jashtë vendit, kryesisht në Kosovë. Kjo ndodh në kushtet kur në Shqipëri flitet për nevojën për financim, duke prodhuar kështu një paradoks, që udhëhiqet nga interesi i bankaave.

Autoriteti i Konkurrencës do të nisë një hetim të thelluar për të gjitha segmentet e tregut të ngarkim, shkarkim, import, depozitim dhe shitje me shumicë të gazit të lëngshëm të naftës për konsum familjar dhe biznes. Ky vendim vjen pas hetimit paraprak të kryer nga ky institucion për produktin e gazit të lengshëm. Në hetim do të përfshihen 9 kompani të tregtimit të këtij produkti për periudhën kohore maj 2015 deri në shkurt 2017.