Turqia bllokon Twitter-in, Erdogan: S'më intereson se çfarë thotë komuniteti ndërkombëtar

Përdorues të Twitter-it në Turqi raportojnë se faqja e rrjetit social është bllokuar. Çdokush që hap faqen twitter.com nga territori i Turqisë nuk do të mund të hyjë në rrjetin social, por do t’i shfaqet një komunikatë e entit rregullator të telekomunikacionit. Dokumenti i referohet një vendimi gjykate për “masa mbrojtëse”. 

Një lëvizje e tillë vjen pas zotimit të kryeministrit, Recep Tayyip Erdogan për të “fshirë Twitter-in”. “Nuk më intereson se çfarë thotë komuniteti ndërkombëtar. Gjithkush do ta shohë fuqinë e Republikës turke”, u shpreh ai të enjten.  

Rrjeti social Twitter është përdorur gjerësisht nga kundërshtarët e Erdogan për ta akuzuar kryeministrin turk për korrupsion. Në Turqi numërohen rreth 10 milionë përdorues të Twitter. Vetë Twitter ende nuk ka mbajtur asnjë qëndrim për këtë gjë.

S.S