Qipro refuzon BE-në dhe i drejtohet për ndihmë Moskës

Qeveria e Qipros i është drejtuar Moskës pasi parlamenti refuzoi propozimin për ndihmë financiare nga Bashkimi Evropian dhe Fondi Monetar Ndërkombëtar. Ministri i financave i Gjermanisë, Wolfgang Schaeuble, ka shprehur mosaprovim të lartë me këtë veprim (parlamenti i Qipros e refuzoi marrëveshjen për ndihmë në vlerë prej 10 miliardë eurosh, pas pakënaqësisë së gjerë brenda dhe jashtë Qipros, meqë në të përfshihej edhe një taksë në depozitat bankare).

Ministri gjerman ka theksuar se dy bankat më të mëdha në Qipro janë të mbështetura për likuiditet emergjent nga Banka Qendrore Evropiane. Sipas tij, “dikush duhet ta shpjegoj këtë te qipriotët”. Ministri i financave i Holandës, Jeroen Dijsselbloem, që e kryeson Eurogrupin është shprehur po ashtu: “Kjo është zhgënjyese, por njëherësh është e qartë se oferta nga Eurozona dhe Eurogrupi për qipriotët ende vlen. Topi është në fushën e Qipros”

Por Ministri i financave i Qipros, Michalis Sarris, tha se vendi i tij do të kërkojë ndihmë financiare nga Rusia. Në Moskë ai tashmë është takuar me Ministrin e Financave të Rusisë, Anton Siluanov, dhe me shefin e Bankës Qendrore të Rusisë, Sergei Ignatiev - njofton Deutsche Welle.

Rusia ka interes special në problemet financiare të Qipros, pasi rusët e pasur kanë afro 31 miliardë dollarë në bankat e Qipros. Presidenti i Rusisë, Vlladimir Putin u shpreh para vendimit të Parlamentit të Qipros se plani i propozuar për hua ku përfshihej taksa në kursimet e klientëve është “jokorrekt, joprofesional dhe i rrezikshëm”. Sipas propozimit të BE, Qeveria qipriote do ishte e obliguar të impononte një taksë prej 9.9% për kursimet më të larta se 130 mijë dollarë, ndërsa për ata që në banka kanë kursime prej 26 mijë e deri në 130 mijë dollarësh, taksa do të ishte 6.75 % e kursimeve të tyre.

a.n.