PD-ja paralajmëron bojkot parlamentar. Por më parë “do konsultohemi me zgjedhësit”

Partia Demokratike paralajmëron një bojkotim të mundshëm të Kuvendit, por për vendimin final mbi këtë çështje do të konsultohet më parë me zgjedhësit. Kryetari i PD-së Lulzim Basha foli sot mbi rishikimin e marrëdhënieve me Parlamentin gjatë mbledhjes së grupit parlamentar. Sipas Bashës, “nuk do të pranojmë t’i japim legjitimet Parlamentit që ka vendosur të bëhet gijotina e ligjit dhe Kushtetutës. Kjo javë të jetë java e zgjedhësit, me qytetarët për të informuar mbi rrezikun vdekjeprurës për veprimet Rama-Meta dhe për vendimet tona”. Duke thënë se protestat e reja do të varen nga ecuria e qeverisjes, Basha theksoi se “populli sovran do të marrë në dorë fatin e tij, gabohen rëndë ata që mendojnë se me dinjitetin e qytetarëve mund të luhet. Shqipëria në protestë është puna jonë si opozitë”. Para se të ndërmarrë nje vendim final për të dalë nga Kuvendi, opozita do të konsultohet me elektoratin e saj. Deputetët e PD-së do të dalin në terren këtë javë për të informuar për vendimin për rishikimin e marrëdhënieve me Parlamentin, por dhe për vazhdën e protestave që opozita do të ndërmarrë.

a.k