Pas mbërritjes së trupave, Prokurori Special Ali Rexha deklaron se të vrarëve në Kumanovë do t’u bëhet autopsia në Kosovë

Sot në orët e para të mëngjesit kanë mbërritur në Kosovë trupat e vrarë në “Lagjen e Trimave” të Kumanovës më 9 e 10 maj. Ndërkohë Prokurori i Prokurorisë Speciale të Kosovës, Ali Rexha tha se do të bëhet autopsia e nëntë kosovarëve të vrarëve në konfliktin e ndodhur në Kumanovë të Maqedonisë më 9 e 10 maj. Autopsia kufomave të përleshjeve u është bërë edhe në Maqedoni. “Arsim Gërxhaliu dhe shërbimi i tij më tregoi se familjarët kanë kërkuar të bëhet autopsia dhe ajo do të bëhet”, tha prokurori Rexha, tranmeton “lajmi.net”. Prokurori Rexha i cili është duke hetuar rastin në Kumanovë të Maqedonisë tha se është duke pritur kërkesën e familjarëve të viktimave për të lëshuar urdhër për autopsi. “Nëse ka nevojë edhe do ta lëshojmë urdhrin për autopsi, sepse e meritojnë pasi që e kanë kërkuar familjarët dhe ajo do të bëhet në bazë të kërkesës së familjarëve. Kur të vijë kërkesa te unë do ta shqyrtoj dhe autopsia do të bëhet”, tha Rexha.